काठमाडौं । सत्तारुढ नेकपा एमालेको केपी ओली समूहले विपक्षी गठबन्धन विरुद्ध प्रदर्शन गरेको छ । ओली एमाले सम्बद्ध नेपाल खेलकुद महासंघ र युवा संघ नेपालको आह्वानमा आइतबार विपक्षी गठबन्धनविरुद्ध राजधानीमा प्रदर्शन गरेका हुन् ।

रमेश पौडेल नेतृत्वको नेपाल खेलकुद महासंघले त्रिपुरेश्वरस्थित दशरथ रंगशाला परिसरमा प्रदर्शन गरेको थियो । प्रदर्शनमा सहभागीहरुले प्रधानमन्त्री एवं एमाले अध्यक्ष केपी ओलीको तस्वीर अंकित पोस्ट कार्ड बोकेका थिए, जसमा ‘खेलाडीहरु जाग्दैछन्, राष्ट्रघातीहरु भाग्दैछन्’, ‘खेलाडीहरुको आह्वान, तोकिएको मितिमा निर्वाचन’ जस्ता नारा लेखिएका थिए । यस्तै युवा संघ नेपालले पनि बिजुली बजारबाट माइतीघर मण्डलासम्म प्रदर्शन गरेको छ ।