काठमाडौं । विपक्षी गठबन्धनका नेताहरूले प्रधानमन्त्री केपी शर्मा ओलीको चर्को आलोचना गरेका छन् ।

सोमबार विभिन्न पेशागत संस्थाका व्यक्तिहरुसँगको छलफलका क्रममा गठबन्धनमा रहेका शीर्ष नेताहरुले प्रधानमन्त्री केपी शर्मा ओली भ्रष्ट पनि भएकोभन्दै आलोचना गरेका हुन् ।

कार्यक्रमलाई सम्बोधन गर्दै माओवादी केन्द्रका अध्यक्ष पुष्पकमल दाहाल प्रचण्डले ओली आफ्नो स्वार्थका लागि जे पनि गर्न तयार हुने तर त्यसको कार्यान्वयन भने नगर्ने नेता भएको टिप्पणी गरे । उनले माधवकुमार नेपालसामू समेत ओली त्यस्तै रुपमा प्रस्तुत हुनसक्ने बताए । उनले भने, ‘अहिले माधजवीको खुट्टामा आएर ढोग्न पनि सक्छन् । जेठ २ गतेमा फर्कन तयार छु भन्न सक्छन् । पालना एउटा पनि गर्दैनन् । त्यसैलाई मैले ओली प्रवृत्ति भन्छु ।’

ओलीले आफूलाई राष्ट्रवादी भनेर भ्रम छरेको आरोप लगाउँदै प्रचण्डले प्रधानमन्त्री ओली भ्रष्ट पनि भएको बताए । अहिलेको अवस्थालाई हेर्दा संसद पुर्नस्थापना हुने दाबी गरेका अध्यक्ष प्रचण्डले अझै पनि ठूलै खेलको गन्ध आएको महसुस गरेको बताए । सरकारले संकटकाल पनि लगाउन सक्ने आशंका गर्दै उनले भने, ‘संविधानमाथि भइरहेको सन्दर्भ र अदालतमा भइरहेको सन्दर्भले संसद त पुनर्स्थापना हुन्छ । सबै तथ्य, प्रमाण, नजिर हेर्दा संसद पुनर्स्थापना हुने कुरामा आशंका गर्ने ठाउँ छैन । तर अझै पनि एउटा ठूलै खेल चलिरहेको गन्ध आउँछ ।’

अध्यक्ष प्रचण्डले संसद पुनर्स्थापना भएपनि त्यो मात्रै समस्याको समाधान नहुन सक्ने बताए । प्रधानमन्त्री ओलीका पछिल्ला अभिव्यक्ति हेर्दा अब उनी ओरालो लागेको अध्यक्ष प्रचण्डको दाबी छ । अदालतलाई खबरदारी गर्ने काम सरकारले गरेको भन्दै उनले भने, ‘पछिल्ला अभिव्यक्ति हेर्दा एउटा त केपी ओली हारे भन्ने बुझेको छु । मलाई सेटिङ गर्‍यो भनेर भन्ने बिचरा प्रचण्डले सेटिङ गरेर हुने अवस्था छ त ?’

संविधानको धारा ७६ (५) को व्यवस्थामा सांसदहरुलाई विषेशाधिकार हुने अध्यक्ष प्रचण्डको जिकिर छ । केपी ओली तल्लो स्तरमा झरेर गाली गर्न लागेको भन्दै अध्यक्ष प्रचण्डले भने, ‘केपीजी सिद्धिनु भयो । नेपालको इतिहासमा कलंकित, बदनाम र तुच्छ स्तरको निरंकुश भएको इतिहास लिएर जाने हुनुभयो । केपीजीलाई सम्झिदा तै बिचरा भन्न मन लाग्छ ।’

यद्यपि, अध्यक्ष प्रचण्डले सरकार जुनसुकै हदमा जाने खतरा रहेको बताए । उनले भने, ‘ओरालो लागेकै बुझ्छु । अझै जुनसुकै हदमा जाने खतरा छ । संकटकालको पक्षमा प्रधानमन्त्री र राष्ट्रपति मिलेर जे गरेपनि हुने अवस्था छ । विभिन्न संस्थाहरुका नेतृत्वको बिचमा त्यही भन्नुभएको पनि होला ।’

प्रचण्डले सत्ता टिकाउन जनता समाजवादी पार्टीको महन्थ ठाकुर पक्षसँग प्रधानमन्त्री ओलीले सहकार्य गरेकोमा टिप्पणी गरे । ‘संविधानको विरोधमा आगो लगाउने, व्यवस्थाविरोधी सबैभन्दा प्यारो भएको छ’, उनले भने, ‘संविधानविरोधीहरुका अघि पुरैका पुरै घोडा टेकेर जानुभएको छ । उहाँको राष्ट्रवादको नकाब योभन्दा उदांगो कहिले होला ?’

छलफलका क्रममा एमालेबाट निष्कासित नेता माधवकुमार नेपालले अध्यक्ष ओलीले मानसम्मान खोज्ने गरेको आरोप लगाए । तर आफूले भने त्यसो नगरेको उनले बताए । उनले भने, ‘हामी आफैँ अरुलाई भन्छौँ, आफू मान्दैनौँ । यसमा नम्बर वान सम्माननीय प्रधानमन्त्री केपी शर्मा ओली हुनुहुन्छ ।’

नेता नेपालले ओलीले ‘मलाई बहुला कुकुरले टोकेको छ र ?’ भन्ने जस्ता शब्द प्रयोग गरेको भन्दै उनले भने, ‘उहाँका हिजो र आजका भाषणहरु ध्यान दिन लायक छन् । रेकर्ड गरेर राख्नुहोला, म पनि खोजिरहेको छु ।’

अहिले आफू संक्रमणकालीन अवस्थामा रहेको भन्दै नेता नेपालले विचलित नहुने बताए । उनले भने, ‘अफ्ठ्यारो अवस्थामा रहेको व्यक्ति वा नेता वा विचार समूहको रुपमा आएको छु । यो गठबन्धन भनेको संविधानको रक्षाका लागि हो र यसमा विचलित हुने छैन ।’ नेता नेपालले आफू राम्रो संस्कारका लागि विगतमा पनि लागेको भन्दै निरन्तर यसमा लागिरहने दाबी गरे ।