काठमाडौं, भदौ २३ । काठमाडौंसहित देशभरका ऋषेश्वर मन्दिरहरूमा आइतबार बिहानैदेखि भिड लागेको छ ।
ऋषि पञ्चमीमा सप्तर्षीको पूजा आरधना गर्न बिहानैदेखि महिलाहरू मन्दिरमा पुग्छन् ।

त्यसअघि नजिकको खोला, ताल, पोखरीमा गएर दतिउनले दाँत माझ्ने, गाईको गोबर र खरानीले स्नान गर्छन् । स्नान गरेपछि अरुन्धतीसहित अत्रि, गौतम, भारद्वाज, जमदग्नि, वशिष्ठ, कश्यप र विश्वामित्रको पूजा गर्ने गरिन्छ ।  जसलाई ऋषिपञ्चमीको पूजा लगाउने भनिन्छ ।

सप्तऋषिको पूजा गर्ने पञ्चमी भएकैले आजको पञ्चमीलाई ऋषिपञ्चमी भन्ने गरिएको हो । आज स्नान गरी पूजा आजा गरेपछि नरोपी उम्रेका अन्न सामा, कागुनो, कन्दमूल र कर्कला आदि खाई एक छाक हविष्य बस्नुपर्ने व्रतविधि छ । ऋषिपञ्चमीको दिन काठमाडौँमा टेकु, मूलपानी, गुह्वेश्वरी लगायतका स्थानमा श्रद्धालु महिला भक्तजनको भीड लाग्छ ।