काठमाडौं । धौलागिरि क्षेत्रमा परेको हिमपहिरोमा ११ जना घाइते भएका छन् ।

मुस्ताङको थासाङ गाउँपालिकामा आइतबार बिहान गएको हिम पहिरोका कारण घाइते हुनेको संख्या ११ पुगेको प्रहरीले जनाएको छ ।

जिल्ला प्रहरी कार्यालय मुस्ताङका प्रहरी नायव उपनिरीक्षक रामकुमार दानीका अनुसार करिब ५ किलोमिटर माथिबाट आएको नाउरीकोट गाउँसम्म आइपुगेको हिम पहिरो देखेपछि भएको भागदौडमा ११ जना घाइते भएका हुन् । आइतबार बिहान धौलागिरि हिमशृङखलाबाट सुरु भएको ठूलो हिम पहिरो थासाङ गाउँपालिका—२ कोवाङसम्म आइपुगेको उनले बताए ।

​कोवाङस्थित जनआदर्श अमरसिंह माविका शिक्षक र विद्यार्थी गरेर ११ जना सामान्य घाइते भएका छन्। भाग्ने क्रममा ९ जना छात्रा, एक जना महिला शिक्षक र एक जना छात्रलाई सामान्य चोट लागेको उनले बताए ।