काठमाडौँ। विवेकशील साझा पार्टीका पूर्व संयोजक उज्वल थापाको निधन भएको छ। कोरोना संक्रमनका कारण  थापा  राजधानीको मेडिसिटि अस्पतालमा जेठ १४ गतेदेखि उपचाररत थिए। १४ गतेदेखि मेडीसिटीमा अत्याधुनिक उपचार बिधि भेन्टिलेटर तथा इक्मो अनुसार उपचार भइरहेको थियो।

‘गत जेठ १७ गते कोरोना संक्रमण मुक्त भएपनि शरिरका अंगहरुले प्रभावकारी रुपमा काम गर्न नसकेर जटिल संक्रमणको प्रभाव रहेकोले उनको स्वास्थ्य स्थितिमा परिवर्तन आउन सकेन। चिकित्सकहरुको अथक प्रयास र सबिको सुभेक्षाका बाबजुद उनको शारीरिक अवस्था सुदृढ हुन सकेन।’ अस्पतालले मंगलबार साँझ जारी गरेको प्रेस विज्ञप्तिमा बताइएको छ। प्रेस विज्ञप्तिमा भनिएको छ, ‘आज मिति २०७८ जेठ १८ गते मंगलबार अपरान्ह ४ बजेर २५ मिनेटमा उहाँको असामयिक निधन भएको जानकारी गराउदछौं।’ सो अस्पतालका प्रवक्ता तथा मेडिकल सुपरिटेण्डेण्ट डा राजा राणा र अस्पतालका मुटु शल्य चिकित्सक डा विजय राजवंशीद्वारा जारी विज्ञप्तिमा उल्लेख छ।

उनको ‘अन्तिम संस्कार एउटा साधारण पारिवारिक तवरले सम्पन्न गर्ने परिवारको इच्छा’ थापाको परिवार, साथी र शुभेच्छुकहरूको तर्फबाट व्यक्त गरिएको छ।