वासिङ्टन । अमेरिकी मध्यावधि निर्वाचनमा रिपब्लिकन पार्टीले पराजय व्यहोरेपछि राष्ट्रपति डोनाल्ड ट्रम्पमाथि आफ्नै पार्टीभित्रबाट दबाब बढेको छ।

अन्तर्राष्ट्रिय समाचार स्रोतमा उल्लेख भएअनुसार अनुसार डेमोक्रेटिक पार्टीले संसद्का दुवै सदनमा नियन्त्रण हासिल गरेपछि रिपब्लिकन नेताहरूले ट्रम्पलाई ह्वाइट हाउसको कर्मचारी टोली परिवर्तन गर्न, प्रशासनमा अनुशासन कायम गर्न तथा इरान युद्ध र भन्सार शुल्कसम्बन्धी नीतिमा पुनर्विचार गर्न आग्रह गरेका छन्।

वरिष्ठ रिपब्लिकन रणनीतिकार जोन फीहेरीले निर्वाचन परिणामलाई ट्रम्पका लागि ठूलो राजनीतिक असफलता भन्दै प्रशासनभित्र व्यापक परिवर्तन गर्नुपर्ने बताएका छन्। रिपब्लिकन सहयोगी तथा रणनीतिकारहरूले ट्रम्पको कार्यशैली र नीतिगत प्राथमिकताले पार्टीलाई चुनावमा क्षति पुर्‍याएको बताएका छन्। विशेषगरी इरान युद्ध र आयातित वस्तुमा लगाइएको भन्सार शुल्कलाई मतदाताको असन्तुष्टिसँग जोडिएको छ।

यसैबीच, अन्तर्राष्ट्रिय समाचार स्रोतमा उल्लेख उल्लेख भएअनुसार उपराष्ट्रपति जेडी भान्सले इरान युद्धलाई रिपब्लिकन पार्टीको चुनावी पराजयको प्रमुख कारण बताएका छन्। उनले सामाजिक सञ्जालमार्फत युद्धका कारण पार्टीले निर्वाचनमा क्षति व्यहोरेको उल्लेख गरेका थिए। तर ट्रम्पले भने इरानलाई आणविक हतियार प्राप्त गर्नबाट रोक्न युद्ध आवश्यक रहेको भन्दै आफ्नो निर्णयको बचाउ गरेका छन्।

ह्वाइट हाउसका वरिष्ठ अधिकारीहरू सम्भावित कर्मचारी बिदाइ, मन्त्रिपरिषद् पुनर्गठन तथा डेमोक्रेटिक पार्टीबाट हुन सक्ने संसदीय अनुसन्धानको तयारीमा छन्। एक वरिष्ठ अधिकारीले प्रशासनभित्र कर्मचारीको मनोबल निकै कमजोर रहेको बताएका छन्। साथै, ट्रम्पको ह्वाइट हाउस बलरुम निर्माण तथा भौतिक संरचना सुधारमा केन्द्रित भएको विषयलाई पनि केही रिपब्लिकन सल्लाहकारहरूले आलोचना गरेका छन्।

यद्यपि ट्रम्पले निर्वाचन परिणामलाई आफ्नो व्यक्तिगत पराजयका रूपमा नलिएको बताएका छन्। Reuters को समाचारमा उल्लेख भएअनुसार उनले तत्काल आफ्नो राजनीतिक दिशा परिवर्तन गर्ने संकेत दिएका छैनन्। उता, संसद्का दुवै सदनमा डेमोक्रेटिक पार्टीको नियन्त्रण भएपछि ट्रम्प प्रशासनका विधेयक रोक्ने, प्रशासनिक निर्णयमाथि अनुसन्धान गर्ने र नियुक्तिहरूलाई चुनौती दिने बाटो खुलेको छ। यसले ट्रम्पको बाँकी कार्यकालमा राजनीतिक चुनौती थप्ने देखिएको छ।