☰
काठमाडौं । नयाँ चीनका जन्मदाता तथा नेता माओ त्सेतुङको १३१औँ जन्म जयन्तीका अवसरमा काठमाडौंमा अन्तरकृया कार्यक्रम हुने भएको छ । सार्वजनिक नीति तथा रणनीति अध्ययन केन्द्रले सो कार्यक्रमको आयोजना गर्ने भएको हो ।
माओको जन्म जयन्तीको अवसर पारेर बिहीबार दिउँसो १ः ३० बजे राजधानीको कमलादीस्थित प्रज्ञा भवनमा अन्तरक्रिया कार्यक्रम राखिएको केन्द्रका प्रमुख ओम शर्माले जानकारी दिए ।
समाजवादी चीनको स्थापनामा माओले खेलेको भूमिका नेपालको सन्दर्भमा पनि उत्तिकै महत्व भएकाले उनको जन्म जयन्तीको अवसरमा कार्यक्रम राखिएको शर्माले बताए ।
उनका अनुसार कार्यक्रममा नेपाल कम्युनिस्ट पार्टीका महासचिव नेत्रविक्रम चन्द विप्लव र नेकपा माओवादी केन्द्रका उपमहासचिव जनार्दन शर्माले ‘माओ दिवस र वर्तमान राजनीति’ विषयमा धारणा राख्नेछन् ।
‘माओको नेतृत्वमा भएको चिनियाँ समाजवादी क्रान्ति नेपालको समाजवादी आन्दोलनमा पनि उत्तिकै सान्दर्भिक छ । यस अन्तक्र्रियाले पार्टी एकता र वाम ध्रुवीकरणबारे विशेष अर्थ राख्छ, शर्माले भने ।
पछिल्लो समय पार्टी एकतालाई लिएर माओवादी अध्यक्ष पुष्पकमल दाहाल र विप्लवबीच तिक्तता बढेको चर्चा भइरहेको अवस्थामा यस कार्यक्रम हुनु अर्थपूर्ण रहेको छ । माओ दिवसको अवसरमा खासगरी माओवादी घटकहरूले विभिन्न कार्यक्रम गरी मनाउँदैछन् ।
