रोल्पामा छुट्टाछुट्टै घटनामा दुईजनाको हत्या गरिएको छ । बिहीबार राति थबाङ गाउँपालिका– ५, उवामा सुतिरहेको अवस्थामा सुनछहरी गाउँपालिका– ५, जैमाकसलाका मसाने भनेर चिनिने सीताराम रोकाक्षेत्रीको अज्ञात समूहद्वारा घाँटी रेटेर हत्या गरिएको छ । उवा ठुलोगाउँको हार्जुवा भन्ने ठाउँमा रहेको सुमित होटेलमा खाना खाएर सुतेका ३६ वर्षीय रोकाको घाँटी रेटेर हत्या गरेको अवस्थामा फेला परेको जिल्ला प्रहरी कार्यालयका प्रवक्ता प्रहरी निरीक्षक रोहितकुमार शाहीले जानकारी दिए ।

लु.१ज १८४७ नम्बरको जिपचालक रहेका उनी बिहान अबेरसम्म पनि नउठेपछि होटेल सञ्चालकले प्रहरीलाई खबर गरेका थिए । त्यसलगत्तै प्रहरी सहायक निरीक्षक देवेन्द्रविक्रम विकको नेतृत्वमा चारजनाको प्रहरी टोली पुगेको थियो । हत्या गर्ने अज्ञात समूहबारे अनुसन्धान जारी रहेको प्रहरीको भनाइ छ । त्यस्तै, सुनछहरी गाउँपालिकाको वडा नं. २ भित्रीगामको जाजा भन्ने गाउँमा बेलुका सामान्य घरझगडामा १८ वर्षीय छोरा सन्तवीर दमाईंले आफ्नै बुबा ३९ वर्षीय नन्दसिङ दमाईंलाई पछाडिबाट दाउरा प्रहार गरी हत्या गरेको जिल्ला प्रहरी कार्यालय रोल्पाले जानकारी दिएको छ ।

कुन विषयमा विवाद भएको हो भन्नेबार यकिन नभएको प्रहरीको भनाइ छ । छोरा सन्तवीरलाई प्रहरीले नियन्त्रणमा लिएर अनुसन्धान भइरहेको बताइएको छ । यता रोल्पा नगरपालिका– २ जापास्थित माडीखोलाको किनारमा पुरुष व्यक्तिको बेवारिसे शव फेला परेको छ । शवलाई घटनास्थलबाट ल्याई रोल्पा अस्पताल रेउघामा राखिएको प्रहरी हवल्दार पूर्ण भण्डारीले जानकारी दिए ।