भियन्ना । अष्ट्रियाको भियन्नामा प्रहरीहरूले एउटा अनौठो दम्पतीमाथि छानबिन गरिरहेका छन् । यी जोडीले ४३ वर्षको अवधिमा एक-अर्कासँग १२ पटक बिहे गरेर सम्बन्ध विच्छेद गरेका थिए ।

कानुनमा रहेको छिद्रको दुरुपयोग गरेर ठुलो रकम कुम्ल्याउन जोडीले बिहे गर्दै सम्बन्ध विच्छेदको नाटक गरेको आशंकामा यो छानबिन भएको हो । यो वृद्ध दम्पतीले हरेक पटक सम्बन्ध विच्छेद गर्दा सन् १९८१ मा उनको पहिलो श्रीमानको मृत्यु पछि उनलाई दिइएको २७ हजार डलर बराबरको गुजारा भत्ता पाउने गरी कागज बनाउँथे ।

अष्ट्रियामा कुनै पनि महिला विवाहित नरहेको अवस्थामा गुजारा भत्ता पुनः पाउन सक्ने व्यवस्था छ । हरेक साढे २ वर्षमा पहिलाको पतिको विधवाको रूपमा पाउने वार्षिक पेन्सनको साढे २ गुणा लिन महिला र उनको दोस्रो श्रीमानले हरेक ३÷३ वर्षमा सम्बन्ध विच्छेद गर्थे । सो पैसा पाएपछि उनीहरू फेरि बिहे गर्थे । दोस्रो श्रीमानसँग १२ औँ पटक सम्बन्ध विच्छेद गरेर महिलाले पहिलो पतिको विधवाको रूपमा पाउने पेन्सन दिन पेन्सन इन्सुरेन्स इन्ष्टिच्युटले नमानेपछि सन २०२२ को मेमा यो घटना प्रकाशमा आएको थियो ।

यस मामिलामा सामान्य छानबिनको क्रममा महिला र उनको वर्तमान पतिले हरेक पटक पैसा लिन सम्बन्ध विच्छेद गर्ने र पैसा पाउने बित्तिकै बिहे गरिहाल्ने गरेको पाइयो । अपराध अनुसन्धान विभागले गरेको अनुसन्धानका क्रममा दुवै जना सधैँ एउटै घरमा बसेर, पकाउने खाने गरेको पनि पाइयो । दम्पतीको छिमेकीहरूलाई भने उनीहरूले सम्बन्ध विच्छेद गर्दै बिहे गरेको थाहा थिएन । अझ छिमेकमा त सबैले उनीहरूलाई मोडल जोडीको रूपमा हेर्थे ।

सन् २०२४ को मार्च १२ मा सर्वोच्च अदालतले एउटा सुनवाइमा एउटै व्यक्तिसँग बारम्बार बिहे र सम्बन्ध विच्छेद गर्दा कानुनको दुरुपयोग हुने र पूर्वपतिको मृत्यु पछि महिलाले बिहे गरिनन् भने मात्रै विधवाले पेन्सन पाउने भनेर फैसला सुनाएको छ । वृद्ध जोडीले धोकाधडीको मुद्दा खेपिरहेका छन् । विगत ४३ वर्षमा दम्पतीले ३ लाख २६ हजार यूरो ठगेका छन् ।