१७ मंसिर, काठमाडौं। विद्यालय शिक्षा विधेयकमा छलफल गर्न संसदीय समितिको बैठक आह्वान भएको छ । प्रतिनिधि सभा अन्तर्गतको शिक्षा, स्वास्थ्य तथा सूचना प्रविधि समितिले यही मंसिर १९ गतेका लागि बैठक राखेको छ । समितिको सचिवालय सिंहदरवारमा बस्ने गरी बैठक बोलाइएको हो । गत असोज ४ गते यता विद्यालय शिक्षा विधेयकमाथि संसदीय समितिमा छलफल हुन सकेको छैन ।

समिति सभापति अम्मरबहादुर थापाका अनुसार विधेयकमाथि संशोधन प्रस्ताव राख्ने संशोधनकर्ता सांसदहरूसँग एकसरो छलफल सकिएको छ । विद्यालय शिक्षा विधेयक २५ असोज २०८० देखि संसदमा विचाराधीन छ । सांसदहरूले १५२ समूहमा एक हजार ७५८ वटा संशोधन प्रस्ताव दर्ता गरेका थिए । संशोधनकर्ता सांसदहरुको प्रस्ताव समेतका आधारमा अब विधेयकमाथि दफावार छलफल सुरु गर्ने शिक्षा समितिको तयारी छ ।

समितिले आन्तरिक रुपमा विधेयकका महत्वपूर्ण विषयहरु पहिचान गरेको छ । त्यसमाथि राजनीतिक सहमति खोज्ने प्रयास समिति सदस्यहरूको छ ।