६ मंसिर, काठमाडौं । करिब एक करोड बराबरको जग्गा ठगी आरोपमा एक व्यक्ति पक्राउ परेका छन् । पक्राउ पर्नेमा गोरखाको शहिदलखन गाउँपालिका–१ का ४८ वर्षीय गोपाल थापा छन् । उनलाई काठमाडौं उपत्यका अपराध अनुसन्धान कार्यालयको टोलीले पक्राउ गरेको हो । बबरमहलबाट पक्राउ परेका उनलाई कारबाहीका लागि जिलला प्रहरी परिसर भद्रकाली काठमाडौं पठाइएको छ ।

नबिल बैंकको खातामा ९५ लाख रुपैयाँ जम्मा गरिदिएको छु भन्दै डिपोजिट स्लिप देखाएर उनले चन्द्रागिरि नगरपालिका बाडभञ्ज्याङको कित्ता नम्बर २२४ र कित्ता नम्बर ४९९ को जग्गा आफ्नो नाममा पास गराएका थिए । तर, रकम नभएको चेक मार्फत जम्मा गरिएको उक्त स्लिपबाट कुनै रकम जम्मा नभएपछि आफू पीडित भएको भन्दै जग्गा पास गरेका व्यक्ति प्रहरीकोमा पुगेका थिए । त्यसपछि उनलाई प्रहरीले पक्राउ गरेको हो ।