काठमाडौं, कात्तिक १५ । बारामा हत्या आरोपमा एक जना पक्राउ परेका छन् ।महागढीमाई नगरपालिका वडा–१ तेगछिया बस्ने ६४ वर्षीय सोथाई चौधरी भन्ने सोथाई खाँ थारू पक्राउ परेका हुन् ।

गत शुक्रबार साँझ घर फर्किने क्रममा सोही ठाउँका ५५ वर्षीय भुमि सुधार भन्ने श्रीनारायणप्रसाद यादवमाथि धारिलो हतियार प्रहार गरि हत्या भएको थियो ।

अनुसन्धानको क्रममा थारूले हत्या गरेको खुल्न आएकोले उनलाई नियन्त्रणमा लिइएको जिल्ला प्रहरी कार्यालय बाराका डिएसपी प्रकाश सापकोटाले जानकारी दिए ।

‘अनुसन्धानको क्रममा भोग चलन गर्दै आएको जग्गासम्बन्धी पुरानो विवादका कारण यादवको हत्या भएको खुल्न आएको छ,’ डिएसपी सापकोटाले भने ।

उनको घरमा खोजतलास गर्ने क्रममा बिहीबार (कात्तिक १५) लुकाई छिपाई राखेको अवस्थामा फलामको कुखुरी फेला परेको छ । उनलाई भने प्रहरीले शुक्रबार नै नियन्त्रणमा लिएर अनुसन्धान अगाडि बढाएको उनले जानकारी दिए ।

प्रहरीले यस घटनामा थप अनुसन्धान गरिरहेको छ ।