काठमाडौं । कुमारी घर, बसन्तपुर-नेपाली संस्कृतिका अंग्रेजी भाषा माध्यमबाट सिद्धहस्त विद्वान् लेखक सिद्धि बहादुर रञ्जितकारद्वारा लिखित “कुमारी: बहुमुखी साक्षात् देवी (सर्वोच्च शक्तिको स्रोत)” पुस्तकको लोकार्पण कुमारी घरमै एक सांस्कृतिक समारोहबीच सम्पन्न भएको छ ।

साक्षात् जीवित देवी कुमारीको इतिहास, संस्कृति र महत्त्व विश्लेषण सहित प्रस्तुत गरिएको पुस्तकको लोकर्पण कुमारी संस्कृतिका लेखकद्वय सिद्धि बहादुर रञ्जितकार र दुर्गा शाक्यले संयुक्त रुपमा गरिएको हो ।

कर्यक्रममा पुस्तकबारे संक्षिप्त मन्तव्य राख्दै लेखक रञ्जितकारले पुस्तकमा कुमारी संस्कृति नेपाली समाजको शक्तिको स्रोत रहँदै आएको र यसले मल्लकालमै व्यापकता लिएको स्पष्ट पारे । पुस्तकबारेमा विद्वान् विश्लेषकहरुको प्रतिकृया अपेक्षा गरेको पनि उहाँले मन्तव्यका क्रममा बताए ।

कार्यक्रममा पुस्तकबारे वरिष्ठ पत्रकारत्रय प्रकाश प्रसाद उपाध्याय, कृष्ण मुरारी अधिकारी र कुमार रञ्जित साथै संस्कृतिविदद्वय राजेन्द्रमान बज्राचार्य र प्रताप मान शाक्यले मन्तव्य राखे ।

चार सय ६४ पृष्ठ रहेको पुस्तक कुमारी संस्कृतिबारे चासो राख्ने विश्वभरीकै अध्येतालाई उपयोगी हुने बताइएको छ ।