काठमाडौँ। त्रिभुवन विमानस्थलमा बम राखिएको हल्लापछि केही समय बन्द भएको विमानस्थल सुचारू गर्ने तयारी भएको छ।

नेपाली सेना, नेपाल प्रहरी र सशस्त्र प्रहरीले सबै स्थानमा जाँच गरिसकेको र बम नभेटिएपछि आन्तरिक उडान सुरू गर्ने तयारी थालिएको विमानस्थल स्रोतले जनाएको छ।

स्रोतका अनुसार यात्रुलाई विमानस्थलको आगमन कक्षमा प्रवेश अनुमति दिइसकिएको र अब केही बेरमा उडान सुचारू हुने छ।

बुधबार करिब साढे १० बजे विमानस्थलस्थित नागरिक उडड्यन प्राधिकरणको कार्यालयमा एक अपरिचित व्यक्तिले फोन गरेर आन्तरिक विमानस्थलको यात्रु प्रतिक्षालयमा बम रहेको बताएका थिए ।

त्यसलगत्तै सुरक्षा निकायले उच्च सतर्कता अपनाउँदै सबै यात्रुलाई बाहिर निकालेर सर्च अपरेसन सुरू गरेको थियो।