हजारको नोट मतदाताको पाउमा चढाएर मत मागिरहेको तस्विर आज निकै चर्चामा आएको छ । निर्वाचन आयोगका अनुसार त्यस्तो गर्नु आचारसंहिताका विपरितको कार्य मानिन्छ ।

भाइरल भएको तस्विरमा एकजना पुरषले महिलाको गोडामा एकहजारको नोट चढाएर ढोग गरिरहेका छन् । सामाजिक सञ्जाल र विभिन्न अनलाइन मिडियामा आएका समाचारहरुका अनुसार उनी सिन्धुपाल्चोकको मेलम्ची नगरपालिका–१० का वडाध्यक्षका उमेदवार अमृत खनाल हुन् । कांग्रेसका तर्फबाट चुनावी प्रचारका लागि घरदैलो गरिरहेका उनले प्रत्येक घरमा यसैगरी भोट मागिरहेको समाचार चर्चामा आएको छ ।

उक्त तस्विर सामाजिक सञ्जालबाट सार्वजनिक भएपछि उनले आफ्नी फुपूलाई ढोग गरेको भन्दै सामाजिक सञ्जालमार्फत् नै स्पष्टीकरण दिएका छन् । उनले पछि प्रष्टीकरण दिएको पोस्ट पनि हटाएका छन् ।

उनले फेसबुक वालमा लेखेका थिए–‘यहाँहरू सबैलाई हार्दिक नमन तथा जय नेपाल । मेरी फुपूदिदीको हातबाट टीका लगाएपछि मैले मेरी दिदीको पाऊ ढोक्दै गर्दा बिना दक्षिणा कसरी ढोग गरूँ ? आदर र सम्मान गर्नु मेरो धर्म हो । यो सकारात्मक संस्कारलाई पनि प्रचार प्रसार गरिदिनु भएकोमा यहाँहरू सबैलाई हार्दिक धन्यवाद ।’

उनले कसैलाई एक हजार त कसैलाई त्योभन्दा बढी रकम पाउमा राखेर ढोग्दै भोट मागिरहेको स्थानीयले बताएका छन् । यसरी पाउमा पैसा राखेर भोट मागिरहेकोप्रति नेकपा एमालेले आपत्ति जनाएको छ । मेलम्चीमा कांग्रेस र राप्रपाबीच चुनावी तालमेल भएको छ ।