काठमाडौँ। पछिल्लो २४ घण्टामा देशभर थप ४ हजार ६ सय ३६ जनामा कोरोना सङ्क्रमण पुष्टि भएको छ ।

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा पीसीआर विधिबाट १०४१२ जनाको परीक्षण गर्दा ३,७०३ जना र एन्टिजेन विधिबाट ४१४४ जनामा परीक्षण गर्दा ९३३ जना गरी जम्मा ४६३६ जनामा  संक्रमण पुष्टि भएको हो । यससँगै देशभर कोरोना संक्रमितको कुल संख्या पीसीआर विधिबाट भएको परीक्षणमा ८ लाख ४९ हजार २०४ र एन्टिजेन विधिबाट भएको परीक्षणमा १ लाख १०४१ जना पुगेको छ।

यस्तै, आज थप ३५० जना कोरोना संक्रमण मुक्त भएका छन् । यससँगै कुल कोरोना संक्रमण मुक्त हुनेको संख्या ८ लाख १६ हजार ३ जना पुगेको छ ।

पछिल्लो २४ घण्टामा संक्रमणबाट थप ४ जनाको मृत्यु भएको छ । नेपालमा कोरोनाबाट ज्यान गुमाउनेको कुल संख्या ११ हजार ६१७ छ । हाल देशभर सक्रिय संक्रमितको संख्या २१ हजार ५८४ रहेको छ ।