काठमाडौं । छिमेकी देश भारतमा तीब्र रुपमा कोरोना संक्रमण फैलिरहेको अवस्थामा नेपालमा पनि संक्रमितको संख्या दिनानुदिन बढ्दै गइरहेको छ । नेपालमा पछिल्लो २४ घण्टामा थप ५ सय ४० जनामा कोरोना संक्रमण पुष्टि भएको छ ।

पछिल्लो २४ घण्टामा ७ हजार २०९ जनाको आरटी–पीसीआर विधिबाट परीक्षण गर्दा ४ सय ७८ जना र ४ हजार ८९० जनाको एन्टिजेन विधिबाट परीक्षण गर्दा ६२ जनामा गरी जम्मा ५४० जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ। योसँगै नेपालमा कोरोना भाइरस संक्रमितको कुल संख्या ९ लाख २६ हजार ९२५ पुगेको छ ।

यस्तै पछिल्लो २४ घण्टामा देशभर २ सय ७१ जना निको भएर घर फर्किएका छन् । योसँगै नेपालमा कोरोना संक्रमणमुक्त हुनेहरुको संख्या ८ लाख १३ हजार ४४७ पुगेको छ ।

पछिल्लो २४ घण्टामा देशभर १२ हजार ९९ जनाको परीक्षण हुँदा हालसम्म कुल ५७ लाख ४६ हजार १३६ जनाको पीसीआर–एन्टिजेन परीक्षण भएको छ ।

यसैगरी पछिल्लो २४ घण्टामा कोरोना संक्रमणका कारण १ जनाको मृत्यु भएको छ । योसँगै नेपालमा कोरोना संक्रमणबाट मृत्यु हुनेको संख्या ११ हजार ६०२ पुगेको छ ।