काठमाडौं । सर्वोच्च अदालतमा आजदेखि गोलाप्रथा प्रणाली कार्यान्वयनमा ल्याइएको छ । आजका दिन सर्वोच्चका न्यायाधीशहरुको उपस्थितिमा पेसी तोक्ने काम सुरुहुँदा प्रधानन्यायाधीशको भने उपस्थिति छैन ।

संयोग भनौ वा दुर्भाग्य ! प्रधानन्यायाधीश चोलेन्द्रशमशेर जबरा अहिले कोराना संक्रमित भई बलम्बुस्थित सशस्त्र प्रहरी अस्पतालमा उपचार गराइरहेका छन् । यता सर्वोच्च अदालतमा गोलाप्रथाद्वारा इजलास तोकिने प्रणालीको शुभारम्भ भैसकेको छ । यो ऐतिहासिक प्रक्रिया सुरु गरिनका लागि यही मंसिर ९ गते नै सर्वोच्च अदालतको फुल कोर्ट बैठक बसेर संशोधित नियमावलीअनुसार मंसिर १५ देखि लागु हुने गरी निर्णय लिइसकिएको थियो ।

यसको कार्यान्वयनमा केही संवैधानिक समस्या उत्पन्न हुन सक्ने भनिए पनि सर्वोच्च अदालत नियमावलीमा प्रधानन्यायाधीश वा अन्य दुई वरिष्ठतम न्यायाधीशहरूको अनुपस्थिति रहेमा त्योभन्दा पछिल्लो वरियता क्रममा रहेका न्यायाधीशहरुको अध्यक्षतामा गोलाप्रथा कार्यान्वयनमा आउन सक्ने व्यवस्था गरिएको छ ।

यसैका आधारमा बुधबार सर्वोच्च अदालतका वरिष्ठतम न्यायाधीश दीपककुमार कार्कीले पेसी व्यवस्थापन निर्देशन समितिको अध्यक्षता गरेपछि उनी पछिका वरिष्ठतम न्यायाधीशहरू मीरा खड्का र हरिकृष्ण कार्कीले दुई सदस्यका रुपमा गोलाप्रथा कार्यान्वयनको जिम्मेवारी लिएका हुन् ।

आज उक्त समितिले व्यवस्थापन गरेअनुसार गोलाप्रथा प्रणालीमा पहिलोपटक पेसी तोकिएको छ । आजैका दिन दुई एकल र नौ संयुक्त गरी ११ इजलास तोकिएका छन् ।