☰
काठमाडौं । अधिकांश ठाउँमा भुटेका चना, भुजा, चाउचाउलगायत खाद्यपदार्थ मिसाएर चटपटे बनाइन्छ । तर, दाङकी सारती अधिकारी भने मकैको चटपटे बेच्छिन् ।
देउखुरी क्षेत्रमा व्यावसायिक रूपमा मकै खेती हुने भएकाले उनले मकैको चटपटे बनाउन थालेकी हुन् । राप्ती गाउँपालिका–३ मसुरियाकी अधिकारी मकैको चटपटेबाट राम्रै आम्दानी भइरहेको बताउँछिन् ।
सुरुमा आफूले पनि भुजा, चाउचाउको चटपटे बनाउने गरेको तर पछि यसमा प्रयोग हुने मेसिन र तालिम गाउँपालिकाबाट निःशुल्क पाएपछि नयाँ काम सुरु गरेको उनले बताइन् ।
‘घरमा त्यसै बस्नुभन्दा व्यवसायमा जोडिएपछि दुई–चार पैसा आवश्यक परेका बेला अरुसँग माग्नुपर्ने बाध्यता अन्त्य भएको छ,’ उनी भन्छन् ।
चटपटे बनाउन प्रयोग गरिने मेसिन निःशुल्क पाएपछि अझ सहज भएको उनको भनाइ छ । मेसिन मकै उसिन्ने, अचार बनाउनेलगायत काममा प्रयोग हुने गरेको छ ।
अन्यको भन्दा मकैको चटपटे सबैले मन पराएर खाइदिने हुँदा व्यवसाय गर्ने हौसला पनि उनमा बढ्दै गएको छ । २८ वर्षीया सारती सोही वडाको खुरुरिया पुलनिर विगत चार वर्षदेखि चटपटेसँगै पानीपुरीको व्यवसाय पनि गर्दै आएकी छन् ।
यो व्यवसायबाट दैनिक एक हजारदेखि एक हजार पाँच सयसम्म आम्दानी हुने उनको भनाइ छ । ‘मासिक १०–१२ हजार बचत हुने गरेको छ’, उनले भनिन् । अघिपछिको तुलनामा शनिबार अझ अलि बढी व्यापार हुने उनले बताइन् ।
