काठमाडौं । वीर अस्पताल र त्रिवि शिक्षण (टिचिङ) अस्पताल महाराजगञ्जको डाक्टर भन्दै ठगी गर्दै आएका एक व्यक्तिलाई प्रहरीले पक्राउ गरेको छ ।

छात्रवृत्तिमा अध्ययन गर्न पाउने कोटामा भर्ना गरिदिन्छु भनी ठगी गर्दै आएका अछाम मंगलसेन नगरपालिका–२ बस्ने चक्रबहादुर बिकलाई अछाम प्रहरीले पक्राउ गरेको हो । छात्रवृत्तिमा एमबीबीएस अध्ययन गर्न पाउने कोटामा ३० लाख रुपैयाँ लिई भर्ना गरिदिन्छु भनी विश्वासमा पारी पीडितबाट पटक पटक गरी नगद १७ लाख रूपैयाँ लिई ठगी गरेको भन्ने सूचनाको आधारमा खटिएको प्रहरीले उनलाई पक्राउ गरेको हो।

त्रिवि शिक्षण अस्पताल महाराजगञ्जमा विदेशी नागरिकले ५० प्रतिशत छात्रवृत्तिमा एमबीबीएस अध्ययन गर्न पाउने कोटामा भर्ना गरिदिन्छु भनी बिकले ठगी गरेको प्रहरीले जनाएको छ। उनले आफूलाई वीर र टिचिङ अस्पतालको एमबीबीएस र एमएस कन्सल्टेन्ट न्यूरोसर्जन डाक्टर दीपक बिसी हुँ भनी चिनाउने गरेका थिए।