काठमाडौँ। पूर्वसांसद तथा नेकपा एमाले केन्द्रीय सल्लाहकार समिति सदस्य गोपाल गुरागाईंमाथि खुकुरी प्रहार भएको छ।

धनकुटा नगरपालिका-६ का नेता ७६ वर्षीय गुरागाईँमाथि आफ्नै छिमेकी २३ वर्षीय दिनेश पोखरेलले शनिबार एक्कासी खुकुरी प्रहार गरेको प्रहरीले जनाएको छ ।

गुरागाईं आफ्नै निवासमा गफगाफ गरिरहेको अवस्थामा एक्कासी खुकुरी प्रहार भएको परिवारको दाबी छ । युवकले के कारणले खुकुरी प्रहार गरे भन्नेबारे खुलेको छैन । गुरागाईँको अनुहारमा गहिरो चोट परेको बताइएको छ ।

उनको धनकुटा अस्पतालमा प्राथमिक उपचारपछि धरानस्थित विपी कोइराला विज्ञान प्रतिष्ठान लगिएको प्रहरीले बताएको छ । हाल उनको अवस्था खतरामुक्त भइसेको अस्पताल प्रशासनले जनाएको छ ।

घटनाबारे गहिरो अनुसन्धान गरेर सत्य तथ्य पत्तो लगाई दोसीमाथि कारवाही गर्न परिवारले जोडदार माग गरेका छन् । नेता गुरागाईं धनकुटाका पुराना बामपन्थी नेता हुन् । उनी २०४८ सालमा सांसद बनेका थिए ।