रुकुम पश्चिमको सदरमुकाम मुसिकोटमा प्रहरी र स्थानीय युवाबीच झडप हुँदा प्रहरी सहायक निरीक्षकसहित ७ जना प्रहरी घाइते भएका छन्।

शुक्रबार राति बागबजारमा भएको झडपका क्रममा प्रहरी सहायक निरीक्षक कोमलराज बोहरासहित ७ जना प्रहरी घाइते भएको जिल्ला प्रहरी कार्यालय रुकुम पश्चिमले जनाएको छ।

घाइते भएका सहायक प्रहरी निरीक्षक बोहोरालाई स्थानीय अस्पतालमा उपचार सम्भव नभएपछि थप उपचारका लागि काठमाडौँ लगिएको छ। बाँकी ६ जनाको स्थानीय अस्पतालमा उपचार भइरहेको छ।

मुसिकोट १ बागबजार नजिकै पार्किङ गरी राखिएको रा १ ख २३९२ नम्बरको ट्रकलाई ढुंगा र बियरको बोतल प्रहार गरेर सिसा फुटाएको अवस्थामा प्रहरीले पक्राउ गर्न खोज्दा प्रहरी र युवाबीच झडप भएको हो।

घटनामा संलग्न ६ जना युवालाई पक्राउ गरिएको प्रहरीले जनाएको छ।