काठमाडौँ । सिरहामा इनारभित्र एक युवकको शव भेटिएको छ । सिरहाको नरहा गाउँपालिका वडा नं. ३ मा रहेको एक इनारभित्र २० वर्षीय युवकको शव शनिबार बिहान फेला परेको हो ।

इलाका प्रहरी कार्यालय मिर्चैयाका अनुसार मृतक युवक गोलबजार नगरपालिका– ८ बस्ने २० वर्षीय शत्रुधन महतो रहेका छन् । महतोलाई इनारभित्र मृत देखेपछि स्थानीयवासीले प्रहरीलाई खबर गरेका थिए । खबरलगत्तै घटनास्थलमा पुगेको प्रहरी टोलीले महतोको शव निकालेर पोष्टमार्टमका लागि पठाएको जनाइएको छ ।

प्रहरीका अनुसार ती युवक शुक्रबार मेलामा झिझिया नाच हेर्न गएका थिए । नाच हेर्ने क्रममा केही युवकबीच झगडा समेत भएको बुझिएको छ । घटनाबारे थप अनुसन्धान भइरहेको र प्रहरीले जनाएको छ।