काठमाडौं । कांग्रेसको युवा संगठन तरुण दलले राष्ट्रपति विद्यादेवी भण्डारीलाई महाअभियोग लगाएर हटाउन माग गरेको छ । प्रधानमन्त्री पदमुक्त नहुँदै राष्ट्रपतिले वैकल्पिक सरकार गठनका लागि आह्वान गरेपछि तरुण दलका अध्यक्ष जितजंग बस्नेतले विज्ञप्ति जारी गरी राष्ट्रपतिलाई महाअभियोग प्रस्ताव ल्याउन माग गरेका हुन् ।

बस्नेतद्धारा जारी विज्ञप्तिमा भनिएको छ, ‘राष्ट्रपति ज्यूको भूमिका सबै नागरिकको अभिभावक हुनुपर्नेमा प्रधानमन्त्रीको कारिन्दा र संविधानको भक्षक जस्तो देखिन आएको हुँदा राष्ट्रपतिलाई महाअभियोग प्रस्तावबाट पदबाट हटाई मुलुकलाई संकटबाट मुक्त गर्नका लागि नेपाल तरुण दल केन्द्रीय समिति जोडदार माग गर्दछ ।’

संविधानविरुद्ध राष्ट्रपतिद्वारा फेरि घात भएको तरुण दलको ठहर छ । ‘संविधानको धारा ७६ को ३ अनुसार नियुक्त प्रधानमन्त्रीले विश्वासको मत पनि नलिएको र राजीनामा समेत नदिएको अवस्थामा नयाँ सरकार गठनका लागि समय तोक्नु गलत छ । संविधानविरुद्ध राष्ट्रपतिद्वारा फेरि घात भएको र यो संविधान विरुद्धको अपराध हो,’ विज्ञप्तिमा भनिएको छ ।

राष्ट्रपति र प्रधानमन्त्रीबाट व्यवहार खेदजनक भएको बस्नेतले बताए । ‘राष्ट्रपति र प्रधानमन्त्रीबाट भएका यस्ता प्रकारका घर व्यवहार संचालन जस्ता देखिने गतिविधिहरु खेदजनक छन्,’ बस्नेतले भने ।