काठमाडौँ। नेपाली कांग्रेसका वरिष्ठ नेता रामचन्द्र पौडेलले पार्टी सभापति शेरबहादुर देउवाको मौनता रहस्यमय भएको बताएका छन् । प्रेस युनियन कास्कीले मंगलबार पोखरामा आयोजना गरेको पूर्णप्रसाद-मायादेवी शान्ति पत्रकारिता पुरस्कार २०७७’ वितरण कार्यक्रमलाई सम्बोधन गर्दै नेता पौडेलले कांग्रेसमाथि अनिर्णयको बन्दी बनेको आरोप लागेको बताएका हुन् ।

नेता पौडेलले भने ‘सभापतिजीको अहिलेको उदासिनता भन्ने कि के भन्ने रहस्यमय लागिरहेको छ । ‘

‘हाम्रो पार्टीलाई पनि अनिर्णयको बन्दीजस्तो भन्ने आरोप लाग्न थालिसकेको छ। म त सुरूदेखि नै संसदमा कांग्रेसको सानो संख्या भए पनि राजनीतिमा विशिष्ट भूमिका छ भन्दै आएको छु,’ उनले भने।

मुलुकलाई अराजकतातिर लैजाने प्रयास भइरहेको भन्दै कांग्रेसले दह्रो निर्णय गर्नुपर्ने उनको भनाइ थियो ।