भारतीय किसानहरुको ट्रयाक्टर मार्चमा प्रहरीले दमन गरेको छ । मार्चमा हुलदंगा मच्चिँदा दिल्लीमा झडप भएको थियो । प्रदर्शनमा आएर लालकिल्ला आसपास जम्मा भएका किसानहरुमाथि पुलिसले लाठीचार्ज गरेको हो । त्यहाँबाट किसानलाई निकाल्ने कोसिस गरिदैं थियो, त्यति नै बेला उपद्रो मच्चियो र लोडफोड सुरु भयो । पुलिसले उनीहरुलाई निकाल्न कडा कदम चाल्यो । तनाव बढेपछि यसक्षेत्रमा केही समय इन्टरनेट पनि बन्द गरिएको थियो । अहिले पनि सयौं प्रदर्शनकारी लालकिल्ला परिसरमा उपस्थित छन् ।

किसानको आन्दोलन चलिरहेका अन्य स्थल सिन्धु, टिकरी, गाजीपुर सीमा, मुकरबा चोक र नांगलोई इलाकामा पनि इन्टरनेट बन्द गरिएको छ । त्यस्तै, दिल्ली मेट्रो प्रबन्धनले आईटिओ, दिलशाद गार्डेन, झिलमिल, मानसरोवर पार्क र जामा मस्जिद मेट्रो स्टेशन बन्द गरिदिएको छ । किसान मोर्चाले आफ्नो आन्दोलन शान्तिपूर्ण भएपनि यसमा अन्य संगठनहरुको घुसपैठ हुँदा झडप निम्तिएको जनाएको छ । मोर्चाले विज्ञप्ति जारी गर्दै भनेको छ, ‘हाम्रो तमाम कोशिसका बाबजुद केही संगठनहरु र मानिसहरुले यसअघि तय भएको रुट तोड्दै गलत काम गरेका छन् ।

प्रदर्शनमा असामाजिक तत्व घुस्यो, अन्यथा यो आन्दोलन शान्तिपूर्ण चलिरहेको थियो । शान्ति नै हाम्रो सबैभन्दा ठूलो ताकत भएकाले हामी सधैं शान्त थियो र यसको उल्लंघनले आन्दोलन कमजार हुनसक्छ ।’ यसअघि प्रदर्शनकारीहरुले लालकिल्लामा पुगेर खलसा पन्थ र किसान संगठनहरुका झण्डा फहराएका थिए । जहाँ स्थानीयरुपमा भारतको राष्ट्रिय झण्डा रहन्छ, त्यहाँ प्रदर्शनकारीहरुले आफ्नो झण्डा फहराए । यद्यपी, राष्ट्रिय झण्डा हटाइएको छैन ।