काठमाडौं । सरकारले देशभर सार्वजनिक यातायात सञ्चालन गर्ने निर्णय गरेको छ । ‘जेनजी’ आन्दोलनका कारण प्रभावित बनेको यातायात सेवा सुचारु गर्ने निर्णय गरेको हो ।

भौतिक पूर्वाधार तथा यातायात मन्त्रालयका सचिव केशवकुमार शर्माको अध्यक्षतामा आइतबार (भदौ २९) सिंहदरबारमा बसेको बैठकले सो निर्णय गरेको हो । प्रदर्शनका कारण एक सातादेखि देशभर सार्वजनिक यातायात रोकिएका थिए ।

सार्वजनिक यातायात व्यवसायी राष्ट्रिय महासंघका महासचिव भरत नेपालले देशव्यापी रूपमा यातायात सञ्चालन भएको जानकारी दिए ।

“आजको बैठकले ढुवानीका मालवाहक सवारीसाधनलाई सहजीकरण गर्ने निर्णय गरेको छ । अग्रिम टिकट बुकिङ असोज ५ गतेदेखि खुला गर्ने तयारी छ,” उनले भने ।

दसैँको अग्रिम टिकट बुकिङका लागि समिति समेत गठन गरिएको छ ।