काठमाडौं । संसदीय समितिले गाँजाको व्यावसायिक उत्पादन र अध्ययन अनुसन्धानका लागि कानुनी रूपमा सहज बनाउन सरकारलाई निर्देशन दिएको छ । शुक्रबार बसेको प्रतिनिधिसभाअन्तर्गतको कृषि, सहकारी तथा प्राकृतिक स्रोत समितिले सरकारलाई यस्तो निर्देशन दिएको हो ।

बैठकमा समिति सभापति डा. आरजु राणाले बजेटमा उल्लेख गरेको गाँजा व्यावसायिक उत्पादन गर्न कानुन निर्माण गर्न गृह र अर्थ मन्त्रालयलाई अनुरोध गरिन् । उनले गाँजा खेतीका विषयमा सबै नागरिकलाई सरकारले गरिरहेको काम र नीतिका विषयमा चासो बढेको बताइन् ।

उनले गृह मन्त्रालयको एक महिनाभित्र नियमवाली बनाउने प्रतिबद्धता सकारात्मक भएको बताइन् । सभापति राणाले आगामी भदौसम्म नियमावली बनाएर समितिलाई बुझाउन गृह मन्त्रालयलाई निर्देशन दिइन् । उनले तीन महिनासम्म सरकारले गर्ने काम हेर्ने र आवश्यकताअनुसार उपसमिति बनाएर गाँजा खेतीको विषयमा आवश्यक काम गर्ने बताइन् ।

“एक महिनाभन्दा पनि आगामी भाद्र महिनासम्म गृह मन्त्रालयले बनाउने नियमावली बन्यो भने खुसी हुन्छौँ । तीन महिनासम्म सरकारले गर्ने काम हेर्छौँ । आवश्यक परे उपसमिति बनाएर काम गर्छौँ । समितिले अर्थ र गृह मन्त्रालयलाई गाँजा व्यावसायिक उत्पादन गर्नेलगायत विषयमा भएको छलफल कार्यान्वयन गरेर लैजान निर्देशन दिन चाहन्छुु,” सभापति राणाले भनिन्, “गाँजा खुला गर्दा हुने नकारात्मक पक्षलाई पनि आत्मसाथ गरेर जानुपर्छ । गाँजाको अध्ययन र अनुसन्धान गर्न तत्काल चाँडो खोल्न गृह मन्त्रालयलाई अनुरोध गर्दछु ।”