काठमाडौं । ६ करोड रुपैयाँ बढीको जुत्तासहितका ३ वटा ट्रक सशस्त्र प्रहरीले नियन्त्रणमा लिएको छ। मकवानपुरको हेटौँडा उपमहानगरपलिका–१५ स्थित पुर्व–पश्चिम राजमार्गबाट ३ वटा ट्रक नियन्त्रणमा लिइएको सशस्त्र प्रहरी बलका सह प्रवक्ता डीएसपी शेलेन्द्र थापाले जानकारी दिएका छन्।

विशेष सुचनाको आधारमा ट्रकलाई चेकजाँच गर्दा जुत्ताको बिल बिजकहरु शंकास्पद देखिएपछि ट्रक नियन्त्रणमा लिइएको हो।

अमेरिकी डलर ४ लाख ८८ हजार १ सय ७३ रुपैयाँ ६३ पैसा (६ करोड ४२ लाख २९ हजार ४ रुपैयाँ ५० पैसा) मुल्य लेखिएको प्रज्ञापनपत्र सहित ना ३ ख ७४५०, ना ३ ख ७६५८ र ना ३ ख ७७५० नम्बरको तीन वटा नियन्त्रणमा लिइएको हो। ट्रकमा लोड भएको एडिडास सुपरस्टार जुत्ताको बिल बिजक शंकास्पद देखिएकाले थप अनुसन्धानका लागि तीनवटै ट्रक राजस्व अनुसन्धान विभाग हरिहर भवन ललितपुरमा बुझाइएको सशस्त्र प्रहरीले जनाएको छ।