काठमाडौँ । चालू आर्थिक वर्षको ९ महिनाको अवधिमा विदेशबाट ९ खर्ब ३ अर्ब रुपैयाँ रेमिट्यान्स भित्रिएको छ । नेपाल राष्ट्र बैंकले सार्वजनिक गरेको देशको वर्तमान आर्थिक तथा वित्तीय अवस्थाको प्रतिवेदनका अनुसार ९ महिनामा ९ खर्ब ३ अर्ब रेमिटेन्स भित्रिएको हो ।

यो अघिल्लो वर्षको यही अवधिको तुलनामा २४.२ प्रतिशतको वृद्धि हो । जबकि, अघिल्लो वर्षको यही अवधिमा रेमिटेन्स आप्रवाह ०.२ प्रतिशतले खुम्चिएको थियो ।

अमेरिकी डलरमा विप्रेषण आप्रवाह १३.९ प्रतिशतले बढेको छ । यससँगै, समीक्षा अवधिमा विदेशबाट ६ अर्ब ९२ करोड डलर रेमिटेन्स भित्रिएको केन्द्रीय बैंकले जनाएको छ । अघिल्लो वर्षको सोही अवधिमा डलरमा रेमिटेन्स आप्रवाह १.८ प्रतिशतले खुम्चिएको थियो ।

समीक्षा अवधिमा श्रम स्वीकृति लिने वैदेशिक रोजगारीका लागि विदेश जानेहरूको सङ्ख्या बढेसँगै रेमिटेन्स आप्रवाह समेत बढेको हो । यो अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत-नयाँ) लिने नेपालीको संख्या ५१.५ प्रतिशतले वृद्धि भई ३,८७,८३९ पुगेको छ ।

त्यसैगरी, वैदेशिक रोजगारीका लागि पुनः श्रम स्वीकृति लिने नेपालीको संख्या समीक्षा अवधिमा ५.५ प्रतिशतले वृद्धि भई २,१७,९५९ पुगेको छ । अघिल्लो वर्षको सोही अवधिमा यस्तो संख्या १९९.९ प्रतिशतले बढेको थियो । यता खुद ट्रान्सफर २२.८ प्रतिशतले वृद्धि भई रु.९९६ अर्ब ८८ करोड पुगेको छ । अघिल्लो वर्षको सोही अवधिमा यस्तो ट्रान्सफर ०.४ प्रतिशतले घटेको थियो ।