काठमाडौं । भारतीय आयल कर्पोरेसन (आईओसी)ले नेपाल आयल निगमलाई पेट्रोलियम पदार्थको मूल्य घटाएर पठाएको छ । आईओसीले पेट्रोलको प्रतिलिटर मूल्यमा १ रुपैयाँ ८० पैसा घटाएर पठाएको निगमले जानकारी दिएको छ ।

यस्तै, डिजेलको मूल्य ४ रुपैयाँ ८० पैसाले घटेको छ भने हवाई इन्धनको मूल्य लिटरमा ५ रुपैयाँ घटेर आएको छ ।
यसको जानकारी दिनका लागि निगमले ५ बजे पत्रकार सम्मेलन गर्ने निगमका प्रवक्ता विनितमणि उपाध्यायले जानकारी दिए ।

“आईओसीबाट पेट्रोलियम पदार्थको मूल्य घटेर आएको छ । त्यसको विषयमा जानकारी दिन ५ बजे पत्रकार सम्मेलन हुँदैछ । उक्त पत्रकार सम्मेलनमा मूल्य समायोजन हुनसक्छ,“ उनले भने ।

पछिल्लो समय आईओसीले पेट्रोलियम पदार्थको मूल्य दुईपटक घटाएर पठाएको छ । तर, निगमले भने नेपाली बजारमा पेट्रोलियम पदार्थको मूल्य समायोजन गरेको छैन ।

अहिले बजारमा पेट्रोलको प्रतिलिटर मूल्य १८१ र डिजेलको १७२ रुपैयाँ छ । भारतबाट सस्तिएर आउँदा पनि घाटा रहेकाले मूल्य समयोजन नभएको बताइएको छ ।