काठमाडौं। नेकपा एकीकृत समाजवादीका अध्यक्ष माधवकुमार नेपालले तत्कालिन नेकपा एमालेमा रहँदा केपी ओलीले आफूहरुलाई अपमान गर्दा  पार्टी विभाजन गर्नुपरेको बताएका छन् ।

बिहीबार पार्टी पुनर्गठन दिवस कार्यक्रमलाई सम्बोधन गर्दै उनले ओलीले पार्टीमा रहेका कमजोरी र असन्तुष्टि समेटेर गुट बनाएको र अन्त्यमा पार्टी कब्जा गरेको आरोप लगाएका छन्।

नेपालले ओली यो गुटमा कसरी आए भनी प्रश्न गरेका थिए । ‘ नेपालको राजनीतिमा केपीले कहिलेदेखि गुटबन्दीको सुरुवात गरे र त्यस गुटबन्दीका विरुद्ध जुध्ने काम हामीले किन गर्न सकेनौ ?’ उनले ओलीको गुटबन्दीविरुद्ध जति जुध्नुपर्ने थियो त्यति जुध्न नसकेको स्वीकार गरे ।

‘झापा संघर्षको बेला पनि नेकपा मालेको कालमा पनि जुध्ने काम भएको थियो । एमाले कालमा पनि जुध्ने काम भयो तर जति जुध्नुपर्ने हो त्यति जुध्न सकेनौ’, अध्यक्ष नेपालको भनाइ छ । जुध्न नसक्दा ओलीको गुट विस्तारै बलियो हुँदै गएको नेपालले बताए । ‘जुध्न नसक्दा उनको गुट बलियो हुँदै गयो, भ्रम फैलाउँदै गए । विभिन्नलाई गोलबन्द गराउँदै गए र नवौं महाधिवेशनमा पार्टीको शक्ति हाँसिल गरे’, पुर्व प्रधानमन्त्री समेत रहेका नेपालको भनाइ छ ।

उनले पार्टी अध्यक्ष भएपछि वास्तविक चरित्र उजार हुँदै गएको भन्दै पार्टी एकता भएपछि आफूहरु खुसी भएपनि ओलीले आफ्नै पहलमा एकता भएको भनेर अहंकार देखाएपछि समस्या भएको बताए । अध्यक्ष नेपालले गुटवादल, भ्रष्टिकरण जस्ता रोग अहिले पनि कम्युनिस्ट आन्दोलनमा कायमै रहेको बताए । ‘सम्भावना राम्रो छ । तर हाम्रा सामु रहेका चुनौतीलाई वेवास्ता गर्यौ भने सम्भावनालाई उपयोग गर्न सक्दैनौ हामी समयमै विश्लेषण गर्न सकेनौ’, उनले क्रान्तिकारी विचारको आधारमा त्यस्ता पार्टीहरूबीच एकता गर्न जरुरी रहेको पनि बताए ।

उनले ओलीको व्यक्तिवादी र दक्षिणपन्थी अवसरवादी तथा विदेशी सामु लम्पसारवाद पर्ने प्रवृति अझै रहेको भन्दै यो प्रवृति कम्युनिस्ट पार्टीमा मात्रै नभएर नेपालको समग्र राजनीतिमा देखापरेको गम्भीर प्रवृति भएको बताए । ‘यसविरुद्ध सवै लोकतान्त्रिक शक्तिले जुध्नुपर्दछ’, अध्यक्ष नेपालको भनाइ छ ।