काठमाडौं । गृहमन्त्री रामबहादुर थापा `बादल´सँग नेपालका लागि अस्ट्रेलियाका राजदूत फेलिसिटी भाेल्कले भेटवार्ता भएकाे छ ।

भेटमा गृहमन्त्री थापाले नेपालमा राजदूतको रुपमा कार्यभार सम्हालेकाेमा राजदूत भाेल्कलाई बधाई तथा सफल कार्यकालको शुभकामना दिँदै उनको कार्यकालमा नेपाल–अस्ट्रेलिया सम्बन्ध थप उचाइमा पुग्ने विश्वास व्यक्त गरे । गृहमन्त्री थापाले गतवर्ष नेपाल र अस्ट्रेलियाबीच कूटनीतिक सम्बन्ध स्थापना भएकाे ६०औँ वर्षगाठ मनाएकाे स्मरण गर्दै दुई देशको सम्बन्ध जनस्तरमा पुगेको टिप्पणी गरे ।

गृह मन्त्रालयमा भएको भेटमा नेपाल–अस्ट्रेलिया द्विपक्षीय सम्बन्ध, सहयोग र आपसी सहकार्यका विषयमा केन्द्रित रहेर छलफल भएको थियो ।

उनले पछिल्लो समय अध्ययन र अन्य कामका लागि नेपालीहरूकाे प्रमुख राेजाई अस्ट्रेलिया पनि एक रहेकाे बताउँदै काेराेना संकटमा अस्ट्रेलियामा रहेको नेपालीहरुकाे सुरक्षाबारे चाँसाे राखेका थिए ।