काठमाडौं ।  लेबनानमा इजरायलले आक्रमण जारी राख्दा त्यसको प्रत्युत्तरमा हिज्बुल्लाहले पनि मिसाइल आक्रमण गरेको छ। दक्षिणी लेबनानका विभिन्न क्षेत्रमा इजरायली हवाई आक्रमण भएपछि अवस्था झन् तनावपूर्ण बनेको छ ।

इजरायली वायुसेनाले सामाजिक सञ्जालमार्फत दिएको जानकारी अनुसार लेबनानमा रहेका हिज्बुल्लाहका ‘आतंकवादी ठिकाना’ र मिसाइल प्रक्षेपण स्थललाई लक्षित गरी आक्रमण गरिएको हो। दक्षिण लेबनानको एक गाउँ आक्रमणपछि पूर्ण रूपमा ध्वस्त भएको र त्यहाँका घरहरू भग्नावशेषमा परिणत भएको तस्वीरहरू सार्वजनिक भएका छन्।

लेबनानको सरकारी सञ्चारमाध्यमका अनुसार इजराइली लडाकु विमानहरूले अन्य शहरहरूमा पनि आक्रमण गरेका छन्। ती आक्रमणमा सर्वसाधारण घाइते भएका छन् भने धेरै घरहरूमा क्षति पुगेको छ।

यता, हिज्बुल्लाहले पनि इसराइलमाथि जबाफी आक्रमण गरेको पुष्टि गरेको छ। समूहले उत्तरी इसराइलतर्फ रकेट प्रहार गरेको जनाएको छ। हिज्बुल्लाह समर्थित टेलिभिजन च्यानल अल–मनारका अनुसार हाइफा शहरलाई ‘उन्नत मिसाइल’मार्फत निशाना बनाइएको हो।

हिज्बुल्लाहले आफ्नो बयानमा आफूहरूले युद्धविरामको पालना गरेको दाबी गर्दै इसराइलले त्यसको उल्लंघन गरेपछि जबाफी कदम चालिएको उल्लेख गरेको छ। साथै, बिंत जबैल क्षेत्रमा इसराइली सैनिकहरूलाई लक्षित गरी रकेट आक्रमण गरिएको पनि जनाइएको छ, यद्यपि यसबारे इजराइली सेनाले औपचारिक प्रतिक्रिया दिएको छैन।

उता, इजरायलको आपतकालीन सेवाले उत्तरी क्षेत्रमा भएको आक्रमणको जवाफ दिइरहेको जनाएको छ। दुवै पक्षबीचको आक्रमण र प्रत्याक्रमणले क्षेत्रीय तनाव थप चर्किएको छ।