काठमाडौँ । हालसम्म टी–२० विश्वकपको आठ वटा संस्करण मात्र सम्पन्न भएका छन्, भने ६ वटा राष्ट्रले मात्र उपाधि चुमेका छन् । टी–२० विश्वकपको हालसम्म सम्पन्न फाइनल खेलमा दुई पटक मात्र पहिले ब्याटिङ गर्ने टोलीले उपाधि जितेका छन् । ती राष्ट्र भारत र वेस्ट इन्डिज हुन् ।

सन् २००७ मा सम्पन्न पहिलो संस्करणको फाइनलमा भारतले चिर प्रतिद्वन्द्वी पाकिस्तानलाई पाँच रनले हराएको थियो । त्यसपछि सन् २०१२ मा सम्पन्न चौथो संस्करणको फाइनलमा वेस्ट इन्डिजले श्रीलङ्कालाई ३६ रनले हराएको थियो ।

यसदेखि बाहेक अन्य संस्करणको फाइनलमा भने जवाफी ब्याटिङ गर्ने टोलीले सफलता हात पारेका छन् । सन् २००९ को फाइनलमा पाकिस्तानले श्रीलङ्कालाई आठ विकेटले र सन् २०१० को फाइनलमा इङ्गल्यान्डले अस्ट्रेलियालाई सात विकेटले हराएको थियो ।

यसैगरी सन् २०१४ को फाइनलमा श्रीलङ्काले भारतलाई ६ विकेटले, सन् २०१६ को फाइनलमा वेस्ट इन्डिजले इङ्गल्यान्डलाई चार विकेटले, सन् २०२१ को फाइनलमा अस्ट्रेलियाले न्युजिल्यान्डलाई आठ विकेटले र सन् २०२२ को फाइनलमा इङ्गल्यान्डले पाकिस्तानलाई पाँच विकेटले हराएका थिए ।