काठमाडौं । संसदीय छानबिन समिति बनाउन विपक्षी दलहरू एकमत भएका छन् । शुक्रबार नेपाली कांग्रेसले बोलाएको विपक्षी दलको बैठकमा छानबिन समिति बनाउन शीर्ष नेताहरू सहमत भएका हुन् ।

सहकारी प्रकरणमा संसदीय छानबिन समिति गठन हुनुपर्नेमा विपक्षी दलहरू सहमत भएको छलफलमा सहभागी एक नेताले जानकारी दिए । ती नेताले भने,‘संसदीय छानबिन समिति गठन हुनुपर्छ भन्ने निष्कर्ष निकालिएको छ ।’

बैठकमा कांग्रेसहित राष्ट्रिय प्रजातन्त्र पार्टी, जनता समाजवादी पार्टी नेपाल, लोकतान्त्रिक समाजवादी पार्टी, राष्ट्रिय जनमोर्चा सहभागी थिए । बिहीबार प्रतिनिधिसभामा विरोधकै बीच सभामुख देवराज घिमिरेले पेलेर सदन अगाडि बढाएपछि कांग्रेस झनै आक्रामक बनेको छ ।

उसले सभामुखको भूमिका तटस्थ नभएको निष्कर्ष निकालेको छ । सहकारी ठगी प्रकरणमा उपप्रधान एवं गृहमन्त्री रवि लामिछाने मुछिएको आरोप लगाउँदै संसदीय छानबिन समितिको माग गर्दै आएको छ ।
समिति नबनेसम्म आफू पछि नहट्ने उसले अडान लिएको छ ।