घोराही, बैशाख १५ ।
पुस्तक दिवसको अवसर पारेर उत्कृष्ट वर्ष पाठक घोषणा गरिएका दाङका दुईजना अध्ययताहरुलाई सम्मान गरिएको छ । घोराहीको सर्वोदय पुस्तकालयमा शुक्रवार एक औपचारिक कार्यक्रमको आयोजना गरि दुईजना अध्ययताहरु प्रहरी निरीक्षक तथा लेखक रामबहादुर जी.सी. र पत्रकार गोविन्द खड्कालाई सम्मान गरिएको हो ।
अध्ययन समूह दाङ र मेधावी कन्सर्न घोराहीको संयुक्त आयोजनामा भएको कार्यक्रममा प्रमुख अतिथिको रुपमा बोल्दै सर्वोदय पुस्तकालयका अध्यक्ष तथा लेखक सुशील गौतमले आफूलाई आलोचनात्मक बनाउन र बिचललनहरुबाट जोगाउन पुस्तक अध्ययनले नै सघाएको चर्चा गर्दै आज यति छिट्टै राजनीतिक सामाजिक क्षेत्रमा विचलन र संकट आउनुको कारण अध्ययन संस्कृतिमा आएको ह्रास जिम्मेवार रहेको पनि बताउनुभयो ।
कार्यक्रममा सम्मानित व्यक्तिहरु जी.सी. र खड्काले अध्ययन सम्बन्धि आ-आफ्ना अनुभवहरु सुनाउनुभएको थियो भने विपिन आचार्य, विनोद के.सी., सशांक पोख्रेल, राजनीतिकर्मी गणेश आचार्य र रामबहादुर जि.एमले पठन संस्कृति सम्बन्धि आफ्ना अनुभवहरुसहित सम्मानित व्यक्तिहरुलाई वधाई मन्तव्य राख्नुभएको थियो ।
मेधावी कन्सर्न घोराहीका संचालक, प्रकाशक तथा साहित्यकार सूर्य वि.सीले सहजीकरण गर्नुभएको कार्यक्रम अध्ययन समूहका प्रमोद धितालको अध्यक्षतामा सम्पन्न भएको थियो ।