चिकित्सकहरूले मधुमेहका बिरामीले चिसो मौसममा आगो, हिटर ताप्दा धेरै नजिक बसेर नताप्न सुझाव दिएका छन् । मधुमेह तथा हर्मोन रोग विशेषज्ञ डा.दीपक मल्लले मधुमेहका बिरामीले आगो र हिटर नजिकैबाट ताप्दा चाँडो छालामा विभिन्न खालका समस्या देखिने भएकोले सचेत रहन आग्रह गरेका हुन् ।

उनी भन्छन्, ‘मधुमेहका बिरामीले आगो, हिटरको धेरै नजिक बस्नु हुँदैन । धेरै तातो पानीले खुट्टा धुनु हुँदैन साथै धेरै तातो पानीले भएको हट ब्यागको प्रयोग धेरै प्रयोग नगर्दा राम्रो हुन्छ ।’ मधुमेहका बिरामीमा शरीरमा कुनै खालको घाउ भएका सफा पानीले सफा गरी स्वास्थ्यकर्मीलाई देखाउन उनको सुझाव छ । उनी भन्छन्, ‘मधुमेहका बिरामीको खुट्टा भएको घाउ पुरा ठीक नहुन्जेलसम्म पुरा ध्यान दिनु पर्छ ।’

खुट्टालाई घाउ, चोटपटकबाट बचाउन चप्पल, जुत्ता नलगाइ खाली खुट्टा नहिँड्न उनको सुझाव छ । ‘मधुमेहमा खुट्टामा जुत्ताले औँलाहरू धेरै कसिने गरी घाउ बनाउने किसिमले लगाउनु हुँदैन, जुत्ता लगाउनु भन्दा पहिले जुत्ता भित्र ढुङ्गा, किल्ला कीरा, कि भनेर हेर्नुपर्छ,’ उनी भन्छन्, ‘मधुमेहका बिरामीले खुट्टामा फोका, घाउ भएको छ कि छैन भनेर ख्याल गर्न पर्छ ।’