☰
काठमाडौँ। यस अघि दुईजना विदेशी पाहुनाहरुमा देखिएको ओमिक्रोनको संक्रमण पछिल्लो समयमा नेपाली नागरिकमा देखा परेपछि यसले चिन्ता उब्जाएको छ । नेपालभित्र ओमिक्रोनको संक्रमण देखिएको यो दोस्रो पटक भए पनि पहिलो पटकको संक्रमण विदेशी पर्यटकहरुमा देखिएको थियो ।
नेपाली जीनमा संक्रमण सुरु भैसकेपछि यसको तीब्र रुपमा हुन सक्ने फैलावट रोक्नका लागि स्वास्थ्य मन्त्रालय तथा यस मातहतका विभागहरु बेलैमा सतर्क हुनुपर्छ । स्वास्थ्य तथा जनसंख्या मन्त्रालयको नियमित प्रेस ब्रिफिङका क्रममा प्रवक्ता डा. संगीता मिश्राले बुधवार ५८ वर्षीय नेपाली नागरिकमा कोरोेनाको नयाँ उत्परिवर्तित भेरियन्ट ओमिक्रोन संक्रमण भेटिएको पुष्टि गरेकी थिइन् ।
यसले नेपाली जनजीवन निकै सतर्क बनाएको छ । निकै चाँडो र व्यापक रुपमा फैलन सक्ने यो भेरियन्टबाट संक्रमित रहेका व्यक्तिको स्वास्थ्यस्थिति हाल सामान्य अवस्थामा रहे पनि यो ती व्यक्तिमा कसरी पुग्यो खोजीको विषय बनेको छ । उनी बाहेक अरु नागरिकमा त्यसको संक्रमण नपाइएको बताइए पनि यसले ढुक्कता सिर्जना भने गर्न सकेको छैन । ती संक्रमित नागरिकको उपचार स्वास्थ्य मन्त्रालयको निगरानीमा भैरहेको भए पनि नेपालीजनमा यो भेरियन्ट संक्रमण भैसकेको छ । यसको स्पष्ट अर्थ हो, नेपाल अब यो भेरियन्टबाट अपवाद रहेन ।
हालसम्म डेल्टा भेरियन्टबाट संक्रमित बिरामीहरु रहेको अवस्थामा अबका दिनमा ओमिक्रोनको पनि संक्रमण बढ्दै जाने आँकलन स्वास्थ्य जगतमा गरिन थालिएको छ । भिन्नखाले उत्परिवर्तन भएकाले पनि यसका लागि नयाँ खाले सोच र जागरुकताको जरुरी हुन गएको छ ।
डेल्टा भेरियन्टका लागि हालसम्म नेपालीमा विकास भएको आनीबानी, सतर्कतामा आएको परिपक्वता र खोपको बिस्तारले धेरै हदसम्म काम गरेको थियो । तर उत्परिवर्तित भेरियन्ट नै भिन्न भएको कारण यसले आमनागरिकमा देखिएको डेल्टा भेरियन्टको संक्रमण भन्दा भिन्न तरिकाले आक्रमण गर्ने देखिन्छ ।
विश्वका अधिकांश देशमा फैलिइसकेको यो भेरियन्टमा संक्रमणको गति निकै तीब्र रहेको छ । नेपाली जनस्वास्थ्यमा महामारी क्रमिक सुधार हुँदै गएको अवस्थामा फेरि यसले अर्को स्वास्थ्य संकट थप्ने देखिएको छ ।
नयाँ भेरिएन्ट ओमिक्रोनको संक्रमण नेपाली नागरिकमै देखा परेपछि यो निकै जटिल र भयाबह हुने आँकलन गर्न थालिएको छ । उता विश्व स्वास्थ्य संगठनले सिंगो युरोपलाई ओमिक्रोनको संभावित विनासबाट बच्न बेलैमा सतर्क रहनु पर्ने चेतावनी दिइरहेको छ ।
वैज्ञानिकहरूले ओमिक्रोन पहिलेका भेरियन्टभन्दा खतरनाक नभएको भनेपनि यो भेरियन्टबाट मृत्यु हुनेको संख्या विश्वमा बढ्दै जान थालेको छ । सुरुको चरणमा त्यति आक्रामक नदेखिए पनि यो भेरियन्टले पछिल्ला दिनहरुमा ठूलो विनास त निम्त्याउने होइन भन्ने आशंका स्वास्थ्यविद र वैज्ञानिकहरुका माझ कायमै छ ।
धेरै युरोपीय देशमा उच्च सतर्कता अपनाइनुका साथै लकडाउन पनि सुरु भैसकेको छ । अमेरिकी वैज्ञानिक तथा डाक्टरहरुले ओमिक्रोनसँग खेलाँची नगर्न र सतर्क रहन बारम्बार आग्रह गरिरहेका छन् ।
अहिले सम्मको परीक्षण र अनुसन्धानमा ओमिक्रोनले खोपसेवा लिएकाहरुलाई गम्भीर बिरामी बनाउन नसकेको खुल्न आए पनि नेपालमा खोप सेवा नलिएकाहरुको संख्या बढी छ । यो जनसंख्यामा ओमक्रोनले सत्यानाश निम्त्याउन सक्छ ।
