काठमाडौं । पछिल्लो २४ घण्टामा कोरोना संक्रमणबाट कसैको पनि मृत्यु भएको छैन । यसको पुष्टि स्वास्थ्य तथा जनसंख्या मन्त्रालयले गरेको छ । तर बिहीबार भने ६ जनाको मृत्यु भएको थियो ।

पछिल्लो समय २४ घण्टाभित्र कोरोना संक्रमितको संख्यामा भने २४६ जना थपिएका छन् । ६ हजार ४ सय जनाको पीसीआर परीक्षण गर्दा २२३ जना र १ हजार ४ सय ३६ जनाको एन्टिजेन परीक्षण गर्दा २३ जना गरी जम्मा २४६ जनामा कोरोना भाइरसको संक्रमण देखिन गएको हो ।

कोरोना संक्रमणमुक्त हुनेको संख्या भने ३४७ पुगेको छ । हाल देशभर कोरोना भाइरसको सक्रिय संक्रमति संख्या ६९२१ रहेको छ । शुक्रबार थपिएसँगै नेपालभर कोरोना संक्रमितको कुल संख्या ९ लाख १७ हजार ७४१ पुगेको हो ।

संक्रमित ६ हजार ९२१ जनामध्ये ६ हजार ५७९ जना होम आइसोलेसन, ३४२ जना संस्थागत आइसोलेसन, बिरामीमध्ये १०७ जना आईसीयु र ३४ जना भेन्टिलेटरमा उपचार गराइरहेका छन् । १० वर्ष मुनिका ५ बालबालिकामा कोरोना संक्रमण पुष्टि भएको छ भने ११देखि २० वर्ष उमेर समूहका २४ जनामा पनि कोरोना संक्रमण देखिएको छ ।