काठमाडौँ। जापानले कोभिड १९ को नयाँ भेरियन्ट ओमिक्रोनको पहिलो केस पुष्टि गरेको छ। अन्तर्राष्ट्रिय समाचार संस्था रोयटर्सका अनुसार नामिबियाबाट जापान आएका व्यक्तिमा उक्त संक्रमणको पुष्टि भएको हो ।

मंगलबार ३०/४० उमेरका पुरुषमा जिन सिक्वेन्सिङपछि संक्रमण पुष्टि भएको समाचारमा उल्लेख छ ।

टोकियो नजिकको नरिता विमानस्थलमा आइतवार आइपुगेका ती व्यक्तिमा नयाँ भेरियन्ट पुष्टि भएको बताइएको छ।

संक्रमित पुरुषको सम्पर्कमा आएको आशंकामा सँगै आएका ७१ जना यात्रुको परीक्षण भइरहेको र १० दिन क्वारेन्टाइनमा राखिने भएको छ ।

विभिन्न मुलुकमा ओमिक्रोन भेरियन्ट फैलिन थालेपछि सोमबार मात्रै जापानले विदेशी यात्रुलाई १ महिनासम्म प्रवेशमा रोक लगाएको थियो ।