काठमाडौँको दरबारमार्गस्थित एक क्यासिनोभित्र अनलाइन जुवा खेलाइहेको अवस्थामा तीनजना भारतीय पक्राउ गरेका छन् ।

प्रहरीले भारतको पञ्जावस्थित रन्जित एभिन्यु घर भई हाल काठमाडौँमा बस्ने ३२ वर्षीय रिसव पावा, भारतको सिद्धार्थ पोष्टमौ घर भएका ५२ वर्षीय गुलाव सिंह र भारतकै दिल्लीस्थित विकासपुरी घर भई काठमाडौं बस्ने ३९ वर्षीय गौरव सिंहलाई पक्राउ गरेको छ ।

प्रहरीले उनीहरुको साथबाट विभिन्न देशका मुद्राहरूको जम्मा नेपाली मूल्य १ करोड ८ लाख ९ हजार ४४५ रुपैयाँ ७३ पैसा पनि बरामद गरेको छ ।

उनीहरूलाई नियन्त्रणमा लिई जिल्ला अदालत काठमाडौंबाट शुक्रबार ७ दिनको म्याद थप भएको काठमाडौँ प्रहरी परिसरले जनाएको छ ।

दरबारमार्गस्थित क्यासिनो प्यालेसको अण्डर ग्राउण्डमा नेपाली कानुनद्वारा निषेध अवैध अनलाइन जुवा खेलाइरहेको अवस्थामा उनीहरू पक्राउ परेका हुन् ।

जुवा खेलाउन संलग्न भारतीयहरूले नेपाल राष्ट्र बैंक ऐन २०५८ विपरीत विदेशी तथा स्वदेशी मुद्राको वित्तीय कारोवार गर्ने गरेको सूचनाको आधारमा जिल्ला प्रहरी परिसर काठमाडौंको टोलीले बिहीबार छापा मारेकाे थियो ।

त्यसक्रममा अवैध अनलाइन जुवा खेलाउने विद्युतीय उपकरण, कागजातहरू, ठूलो मात्रामा स्वदेशी तथा विदेशी मुद्रा पनि बरामद भएको छ ।