नवलपुर । जिल्लाको विनयी त्रिवेणी गाउँपालिका–३ चिसापानीमा श्रीमानले खुर्पा प्रहार गर्दा श्रीमतीको घटनास्थलमै मृत्यु भएको छ।
मंगलबार बिहान करिब ८ः४५ बजे ४३ वर्षीय शेरबहादुर विकले उनकी श्रीमती ४० वर्षीया उनिमाया विकको घाँटीमा धारिलो हतियार (खुर्पा) प्रहार गरेको प्रहरीले जनाएको छ।

खुर्पा प्रहारबाट गम्भीर घाइते भएकी उनिमायाको घटनास्थलमै मृत्यु भएको जिल्ला प्रहरी कार्यालय नवलपुरका प्रहरी निरीक्षक मोहनकुमार खड्काले जानकारी दिए। उनिमाया शेरबहादुर कि कान्छी श्रीमती हुन्।

घटनाको खबर प्राप्त भएपछि अस्थायी प्रहरी पोस्ट सर्दीबाट प्रहरी नायब निरीक्षक सिताराम चौधरीको कमाण्डमा टोली घटनास्थलमा पुगेको थियो।

प्रहरी टोलीले घटनामा संलग्न शेरबहादुर विकलाई नियन्त्रणमा लिई थप अनुसन्धानका लागि इलाका प्रहरी कार्यालय दुम्किबास पठाएको जानकारी दिएको छ। घटनाका बारेमा अनुसन्धान भैरहेको प्रहरी निरीक्षक खड्काले बताए।