काठमाडौँ । काठमाडौँको बालाजुस्थित ओग्यन जम्लिङ टेरमा गुम्बामा डोजर चलाउने तयारी गरेपछि बौद्ध धर्मावलम्बीहरूले कडा आपत्ति जनाएका छन् । बुद्धको २५७०औँ जन्मजयन्तीको अवसरमा विश्वभर शान्ति र समृद्धिको सन्देश फैलाउने काम भइरहेका बेला शुक्रबार अनधिकृत भन्दै उक्त गुम्बामा डोजर चलाउने सूचना दिइएपछि उनीहरूले आक्रोश पोखेका हुन् ।
उनीहरूले यस कदमलाई बौद्ध धर्ममाथिको ठाडो प्रहारका रूपमा लिँदै प्रधानमन्त्री बालेन्द्र साहको चर्को आलोचना गरेका छन् । साहले आफ्नो शपथग्रहण बौद्ध भिक्षुहरूलाई साक्षी राखेर गरे पनि अहिले सोही धर्मको आस्थाको केन्द्रमा डोजर चलाउन खोज्नु सह्य नहुने गुम्बाका सञ्चालक उमेश लामाले बताए ।

यसलाई बौद्ध धर्ममाथिकै आक्रमण भन्दै उनले भने, ‘यो गुम्बा भत्किँदै गर्दा कुनै पनि बौद्ध धर्मावलम्बीमाथि आक्रमण नहोस्, आस्था राख्नेहरूमाथि डोजर नचलोस् । गुम्बा भत्काउने कुरामा सहजीकरण गर्न हामी तयार छौँ तर के यो गुम्बा फेरि यही अवस्थामा उभिन सक्छ ? मेरो प्रश्न छ । यो बौद्ध धर्ममाथिको ठाडो प्रहार हो । किनभने हिजो बालेन्द्र शाह प्रधानमन्त्री हुँदाखेरी १०७ जना भिक्षुहरु साक्षी राखेर शपथ खाएर ढोङ पिटनेहरु आज गुम्बामा डोजर चलाइँदैछ । यसमा विचार पुर्‍याउनु पर्दैन ?’

लामाले यो कुनै अतिक्रमण नभई गुम्बाको नाममा रहेको ८ आना जग्गा कब्जा गर्न बौद्ध धर्ममाथि गरिएको आक्रमण भएको दाबी गर्दै यस्तो काम नगर्न चेतावनी दिए । करिब ८ आना जग्गामा २०५७ सालमा स्थापना गरिएको उक्त गुम्बाको हाल १४/१५ करोड मूल्य पर्ने सञ्चालक समितिको अनुमान छ ।

सञ्चालक समितिका सदस्यसमेत रहेका लामाले उक्त गुम्बा राज्यकै सम्पत्ति भए पनि डोजर आतङ्क चलाएर आफ्नै सम्पत्ति नष्ट गर्न खोजिएको जिकिर गरे । साढे २ तले उक्त गुम्बाको भवनमा डोजर चलाउने प्रयास गरेर गुम्बा संरक्षण गर्ने आफ्नो दायित्वसमेत बिर्सिएको भिक्षुहरूको गुनासो छ ।