काठमाडौं । मनमोहन कार्डियोथोरासिक भास्कुलर एन्ड ट्रान्सप्लान्ट सेन्टरमा उपप्राध्यापकका रुपमा कार्यरत डाक्टर स्मृति शाक्यले म्युजिक भिडियो बजारमा ल्याएकी छिन् । उनले ‘मैले मायाँ लाएको धोका दिन होइन, मैले प्रीति गाँसेको दुःख दिन होइन’ बोलको गीतको म्युजिक भिडियो बजारमा ल्याएकी हुन् ।

युट्युबमार्फत सार्वजनिक गरिएको उक्त गीतमा पूर्वप्रदेशमन्त्री डाक्टर अजयक्रान्ति शाक्यको शब्द रहेको छ । संगीत पनि पूर्वमन्त्री शाक्यकै रहेको छ । म्युजिक भिडियोको छायाङ्कन देवकुमार श्रेष्ठको निर्देशनमा भएको हो । म्युजिक भिडियोका सबै दृष्य काठमाडौं र ललितपुरमा छायाङ्कन गरिएको छ ।

म्युजिक भिडियोमा नायक आकाश श्रेष्ठ र नायिका करुणा श्रेष्ठको मोडलिङ रहेको छ । म्युजिक भिडियोमा चिकित्सक शाक्य स्वयंको पनि अभिनय देख्न सकिन्छ । शाक्यले यसअघि अरुणा लामा र रुद्रमणिको गायन तथा अम्बर गुरुङको संगीत रहेको गीत ‘ए–कान्छा मलाई सुनको तारा खसाइ देऊन’ बोलको गीत हरिशरण सायमीसँग ‘कभर सङ’ गाएकी थिइन् ।

पूर्वमन्त्री शाक्यकै शब्द तथा संगीत रहेको ‘केही मिठा कुरा गरौँन, दुई कदम सँगै हिँडौँन, जिन्दगीको के भरोसा, माया माया तिमी नै माया’ बोलको गीतमा चिकित्सक शाक्यकै स्वर रहेको छ । यो गीत पनि छायाङ्कनको क्रममा रहेको छ ।