काठमाडौं । राष्ट्रिय स्वतन्त्र पार्टीका सांसद विराजभक्त श्रेष्ठले श्रमजीवी पत्रकारले पारिश्रमिक नपाएको विषयलाई राज्यले बेलैमा हल गनुपर्नेमा जोड दिएका छन् ।

संघीय संसद भवनमा आइतबार बसेको प्रतिनिधि सभा बैठकमा राज्यको चौथो अंग आमसञ्चार माध्यममा कार्यरत श्रमजीवीले समयमै पारिश्रमिक नपाएको विषय उठेको हो । राज्यले समयमै श्रमजीवीका समस्या हल गर्न नसके देशमा लोकतन्त्र फस्टाउन नसक्ने रास्वपा सांसद श्रेष्ठको भनाइ छ ।

‘श्रमजीवी पत्रकारहरुले झेल्दै आइरहेका समयमै पारिश्रमिक नपाउने समस्यालाई राज्यले बेलैमा हल गर्न सकेन भने देशमा लोकतन्त्र फस्टाउन सक्दैन’ सांसद श्रेष्ठले भने ।

श्रेष्ठले राज्यको चौथो अंगमा कार्यरत श्रमजीवीले समयमै पारिश्रमिक पाउनु पर्ने होकि होइन ? भन्दै प्रश्न पनि गरे । श्रमजीवी पत्रकारहरुले पारिश्रमिक नपाएको विषय सञ्चारगृहहरुबाट सडकसम्म पुगेको बताएका श्रेष्ठले श्रमजीवीको पारिश्रमिक बेलैमा उपलब्ध गराउने वातावरण बनाउन सरकार लाग्नुपर्नेमा जोड दिए ।