☰
काठमाडौँ। युक्रेनका राष्ट्रपति भोलोदिमिर जेलेन्स्कीले युद्धको विरुद्ध विश्वभरका मानिसलाई सडकमा उत्रिन अपिल गरेका छन् ।
रुसले आफ्नो देशमा आक्रमण गरेको एक महिना पुगेको दिनमा राष्ट्रपति जेलेन्स्कीले बिहीबार विश्वभरमा मानिसलाई सडकमा उत्रिएर उनको देशप्रति समर्थन जनाउन आग्रह गरेका हुन् ।
आफ्नो दैनिक सम्बोधनका क्रममा केहीबेर अङ्ग्रेजीमा बोल्दै उनले मानिसहरूलाई युक्रेनी प्रतीक लिएर आउन भनेका छन् ।
राष्ट्रपति जेलेन्स्कीले भनेका छन्, ‘तपाइँहरू आफ्ना सहरका चोक तथा सडकमा आउनुस्। देखिनुस् र सुनिनुस्। मानिसको जीवनको महत्त्व छ, स्वतन्त्रताको महत्त्व छ, शान्तिको महत्त्व छ अनि युक्रेनको महत्त्व छ भनेर बोल्नुस्,’ उनले भने, ‘मार्च २४ मा युद्ध रोक्न चाहने सबैजना एकत्रित हुनुस् ।’
उनले युक्रेनमा रुसले स्वतन्त्रताविरुद्ध युद्ध छेडिरहेको पनि बताए ।उनले रुसको निर्मम र मुढे बललाई संसारले रोक्नुपर्ने बताए ।
रुसले आक्रमण गरेको एक महिना बितिसकेको र यसबीच आफ्नो, सबै युक्रेनी जनताको अनि यस धरतीका सबै स्वतन्त्र मानिसको मुटु चुँडिएको उनले बताए ।
ब्रसल्समा नेटो बैठक हुन लागेको बेला उनको सम्बोधन आएको हो। बीबीसी
