काठमाडौं । ललितपुर पाटनमा उद्यमी मेला सुरु भएको छ । ‘महिला सशक्तीकरणको आधार : उद्यमशीलता र रोजगार’ भन्ने नाराका साथ ललितपुरको नागबहालमा शुक्रबारदेखि महिला उद्यमी मेला सुरु भएको हो ।

१ सय १२ अन्तर्राष्ट्रिय महिला दिवसको अवसरमा ललितपुर महानगरपालिका १६ ले सो मेलाको आयोजना गरेको हो । मेलाको उद्घाटन गर्दै बाग्मती प्रदेशका स्वास्थ्यमन्त्री निमा लामाले महिलाद्वारा उत्पादित सामग्री प्रवर्द्धन गर्न यस किसिमका मेलाहरु उपयोगी रहेको धारणा व्यक्त गरेका थिए ।

मन्त्री लामाले ललितपुरमा हस्तकलाका सामग्री अन्तर्राष्ट्रिय बजारमै ठूलो माग हुने गरेको र नेपालले तुलनात्मक लाभ लिन सकिने सामग्री रहेको बताउँदै यसको प्रवर्द्धनमा राज्यले ठोस र प्रभावकारी भूमिका निर्वाह गर्नुपर्ने बताएका छन् ।

सो अवसरमा वाग्मती प्रदेशका सांसद् शोभा शाक्यले ललितपुरलाई विश्वको ३५औं कला नगरीको घोषणा गरेको ३ वर्ष बितिसक्दा पनि त्यस दिशामा खासै काम नभएको बताइन् ।

ललितपुर महानगरपालिकाका उपमेयर गीता सत्यालले महिलालाई आर्थिक रुपमा सवलीकरण नगरेसम्म महिला व्यावहारिक र वास्तविक रुपमा सशक्तिकरण नहुने धारणा राखिन् ।

मेलाका मुख्य संयोजक एवम् वडाअध्यक्ष निर्मलरत्न शाक्यले वडाले पूर्वाधार विकाससँगै मानवीय विकासलाई प्राथमिकतामा राखेर कार्यक्रम गर्दै आएको जानकारी दिँदै मेला यसैको एउटा कडी रहेको बताए ।

आइतबारसम्म सञ्चालन हुने सो मेलामा महिलाद्वारा उत्पादित र महिला संलग्न रहेको व्यवसाय सम्बद्ध ५१ वटा स्टलहरु राखिएको छ । धातुका मूर्तिहरुका बुट्टा कोर्ने, परम्परागत रुपमा सुकुल बुन्ने तरिका विषयमा जीवन्त प्रदर्शनी मेलामा हर्न सकिने छ ।

ललितपुर उद्योग वाणिज्यले ललितपुरमा उत्पादित वस्तुको प्रवद्र्धन अघि सारेको ‘मेड इन ललितपुर’को अवधारणाअनुरुप ललितपुरमा उत्पादित वस्तुको स्टल विशेष महत्वका साथ राखिएको छ ।

नेपाल हस्तकला महासंघ, ललितपुर हस्तकला संघको तर्फबाट धातुका मूर्तिहरु र अन्य हस्तकलाका सामग्रीहरु पनि प्रदर्शन तथा बिक्री वितरणको लागि राखिएको छ ।

मेलामा हस्तकलाको प्रत्यक्ष कार्यशाला समेत राखिएको छ । मेला परिसरमा फुट स्टल, फोटो तथा कला प्रर्दशनी समेत हेर्न सकिन्छ ।