☰
हेटौंडा । सम्पत्ति शुद्धीकरण विभागको टोलीले बागमतीका मुख्यमन्त्री इन्द्रबहादुर बानियाँको घर तथा उनकै निर्माण कम्पनीका कार्यालयमा सोमबार छापा मारेको छ।
सम्पत्ति शुद्धीकरणसम्बन्धी अनुसन्धानका क्रममा विभागको टोलीले बानियाँको घर तथा उनकै स्वामित्वमा रहेको निर्माण कम्पनीको कार्यालयमा छापा मारेको जनाइएको छ।
छापा मार्नका लागि विभागको टोली काठमाडौँबाट हेटौंडा पुगेको थियो । मुख्यमन्त्री बानियाँको हेटौंडास्थित निवासमा विभागको टोलीले करिब दुई घण्टा बिताएको स्रोतले जनायो । स्रोतका अनुसार मध्याह्न करिब १२ बजे पुगेको टोली करिब २ बजे बानियाँको घरबाट बाहिरिएको थियो।
अनुसन्धानमा संलग्न एक अधिकारीका अनुसार हेटौंडा–५, पिप्लेस्थित बानियाँ निर्माण सेवा (बीएनएस) कम्पनीको कार्यालयमा पनि विभागको टोलीले छापा मारेको छ । सम्पत्ति शुद्धीकरण सम्बन्धी उजुरीका आधारमा विभागले अनुसन्धान गरेको बताइएको छ।
यस्तै मुख्यमन्त्री बानियाँको घरमा पनि विभागका ७ जना सम्मिलित टोलीले छापा मारेको हो । विभागको टोलीले मुख्यमन्त्री बानियाँको घर तथा निर्माण कम्पनीको कार्यालयबाट केही कागजात अनुसन्धानका लागि लगेको अनुसन्धानमा संलग्न ती अधिकारीले जनाए । यद्यपि, उनले ती कागजातको विवरण भने खुलाउन चाहेनन्। मुख्यमन्त्री बानियाँले यसबारे कुनै प्रतिक्रिया जनाएका छैनन् ।
बानियाँ निकट स्रोतका अनुसार बानियाँ संसदीय दलको बैठकमा सहभागी भएको अवस्थामा छापा मारिएको घटनाबारे जानकारी पाएका थिए। संसदीय दलको बैठकमा सभामुख चयन र मन्त्रिपरिषद् फेरबदलबारे छलफल भइरहेको थियो।
