काठमाडौँ। संगीतकर्मी दुर्गेश थापाले ‘बिच्च बिच्चमा ५’ भनेर गीत सहित भिडियो ल्याएका छन्। मंगलबार ‘डी सिरिज’ युटुव च्यानलबाट सार्वजनिक गरिएको उक्त गीतको भिडियोलाई २४ घण्टा नबित्दै करिब १० लाख दर्शकहरुले हेरिसकेका छन्। गीतको भिडियो युटुवमा ट्रेण्डिङ्गको उकालो लागिरहेको छ।

यो सामग्री तयार पारिरहँदा सो गीतको भिडियो ९ लाख २५ हजार दर्शकले हेरिसकेका छन् भने ६ हजार ५ सय वढीले प्रतिक्रिया दिएका छन्। ‘चट्ट सारी लगायर लाली ओठमा,परार नाच्यौ बीच्च बीच्च पोहर नाच्यौ छेउमा,यसपाली त नाच दिदी आफ्नो कोठामा’ भन्दै समूहमा नायक पल शाह र दुर्गेश थापाले नृत्य गर्दै भिडियो सुरु हुन्छ।

‘बीच्च बीच्चमा ५’ नाम दिइएको सो गीतको शब्द र संगीत रचना दुर्गेश थापाले गरेका छन्। बसन्त थापा र दुर्गेश थापाको आवाजमा रहेको उक्त गीतको संगीत संयोजन शाहस शाक्यले सम्पन्न गरेका छन्।

गीतको भिडियोको निर्देशन र नृत्य निर्देशन काजिस श्रेष्ठले गरेका छन्। गीतको भिडियोमा बाल कलाकारहरु जुम्ल्याहा जेभिन र जेभिस साथै आयुषी ढकाल र सिमोन कोंजुले समेत नृत्य तथा अभिनय गरेका छन्।

हेरौं भिडियो ⇓